ભુજ, તા. 29 : કરાટેની તાલીમ માટે આવતી સગીર
વયની વિદ્યાર્થિનીની જાતિય સતામણી કરવાના આ શહેરના માર્ચ-2019ના ફોજદારી કેસમાં અત્રેની
ખાસ અદાલતે મુખ્ય આરોપી કરાટે ટ્રેઈનર મૂળ નખત્રાણા તાલુકાનાં નાની અરલ ગામના અને ભુજના
પ્રમુખ સ્વામી નગરમાં રહેતા વિનોદ પ્રેમજી પટેલને પાંચ વર્ષની સખત કેદ અને 60 હજાર દંડ તથા મદદકર્તા મૂળ
મધ્યપ્રદેશના વતની અને ભુજના પ્રમુખ સ્વામી નગરના રહેવાસી પવન રામચંદ્ર સરગરાને ત્રણ વર્ષની સખત કેદ અને પાંચ
હજાર રૂપિયાના દંડની સજા ફટકારી હતી. જે તે સમયે ભારે ચકચારી બનેલા આ કિસ્સાનો કેસ
અહીંની ખાસ અદાલતમાં સ્પેશિયલ જજ જે.એ. ઠક્કર સમક્ષ ચાલ્યો હતો. તેમણે બંને પક્ષની
દલીલો ઉપરાંત 14 દસ્તાવેજી પુરાવા અને સાત સાક્ષીને
તપાસી બંને આરોપીને તકસીરવાન ઠેરવતા તેમને સખત કેદ અને દંડની આ સજા સંભળાવી હતી. આ
સુનાવણીમાં સરકાર પક્ષે જિલ્લાના મુખ્ય સરકારી વકીલ એચ.બી. જાડેજા હાજર રહ્યા હતા.
અદાલતે મુખ્ય આરોપી કરાટે ટ્રેઈનર વિનોદ પટેલને પોક્સો ધારાની કલમ 8 મુજબના ગુનામાં જવાબદાર ઠેરવી પાંચ વર્ષની
કેદ અને 50 હજાર દંડ, કલમ 354 (એ.) મુજબ છ માસની કેદ અને પાંચ હજાર દંડ અને કલમ 506 બદલ એક વર્ષની કેદ અને પાંચ
હજારના દંડની સજા કરી હતી. જ્યારે મદદકર્તા આરોપી પવન સરગરાને પોક્સો ધારામાં ત્રણ
વર્ષની કેદ અને પાંચ હજાર દંડ, 354 (એ) અન્વયે છ માસની કેદ તથા
કલમ 506 અનુસંધાને છ માસની સખત કેદનો
આદેશ ચૂકાદામાં કરાયો હતો. ન્યાયાધીશ શ્રી ઠક્કરે તેમના આ ચૂકાદામાં ભોગ બનનારને એક
લાખ રૂપિયા વળતર પેટે ચુકવવા ડી.એલ.એસ.એ.ને આદેશ કર્યો હતો. આરોપીઓ દ્વારા ભરાનારી
દંડની રકમ પણ ભોગ બનનારને ચુકવવા હુકમ કર્યો
હતો. સાથેસાથે ભોગ બનનારનું જીવન અને શિક્ષણ સારી રીતે પુન: સ્થાપિત થાય તે માટે કાળજી
લઈને યોગ્ય કરવા સી.ડબલ્યુ.સી. અને ડી.સી.પી.યુ.ને આદેશ કરાયો હતો. આ કેસની પૂર્વ વિગતો
એવી છે કે, બનાવના સમયે 14 વર્ષની ઉંમરની ભોગ બનનારી કન્યા
આરોપી વિનોદ પટેલના વર્ગમાં કરાટે શીખવા જતી હતી. કરાટેની તાલીમ આપવા દરમ્યાન અને વિવિધ
સ્પર્ધામાં ભાગ લેવા માટે જિલ્લાની બહાર જવા
સમયે અશોભનીય હરકત સાથે જાતિય સતામણી સહિતની હરકતો કરી હતી, તો ઈન્સ્ટાગ્રામ ઉપર થયેલી વાતચીતને ઢાલ બનાવીને
કન્યાને ધાકધમકી પણ કરવામાં આવી હતી. અંતે આ સમગ્ર મામલા બાબતે અત્રેના એ. ડિવિઝન પોલીસ
મથકે ગુનો દાખલ થયો હતો. જે કેસમાં ખાસ અદાલતે સજા-દંડનો આ ચૂકાદો આપ્યો હતો.
