ભુજ, તા. 29 : ટ્રેઇલરમાં ભરેલા ઉત્તમ ગુણવતાવાળા
કોલસાની ચોરી કરી તેની જગ્યાએ નબળી ગુણવતાના કોલસા ભરી કંપની સાથે વિશ્વાસઘાતની કોશીશ
કરતા એક શખ્સને ટ્રેઇલર સાથે અબડાસામાંથી એલસીબીએ ઝડપી કાયદેસરની કાર્યવાહી કરી હતી.
એલસીબીએ જાહેર કરેલી વિગતો મુજબ તેમની ટીમ અબડાસાના નલિયા બાજુ પેટ્રોલિંગમાં હતી ત્યારે
માંડવી તરફથી આવતા ટ્રેઇલર નં. જી.જે. 39-ટી. 9223ને અટકાવી
તેના ચાલક રાજસ્થાનના અજમેર જિલ્લાના ફિરોજ છોટુજી કાઠત પાસે ગાડીમાં ભરેલા માલ બાબતે
આધાર-પુરાવા માંગતા તેણે રિશી ઇન્ટરનેશનલ લોજિસ્ટિક ટ્રાન્સપોર્ટનો ગેટ પાસ અને શીલ
પેકિંગ કરેલી પહોંચ તથા શિવાન્યા એન્ટરપ્રાઇઝ ટ્રાન્સપોર્ટના ચલણની પહોંચ અને બિલ્ટી
રજૂ કરી હતી. તેમાં ઉત્તમ ગુણવતાનો કોલસો હોવાનું લખેલું હતું. જો કે, ટ્રેઇલરમાં મિકસીંગ કરેલો કોલસો જણાયો હતો.
જેથી પુછપરછ કરતા ચાલકે કબૂલાત કરી કે, તે કંડલા પોર્ટમાંથી ઉત્તમ
ગુણવતાનો કોલસો ભરી નિલકંઠ પાર્કિંગમાં ટ્રેઇલર પાર્ક કરી શીલ કરાવ્યા બાદ જણાવ્યું
કે, ટ્રેઇલરમાંથી કોલસો કાઢવાનો છે જેથી ટ્રેઇલર આપણા વાડા પર
લઇ ટ્રેઇલર વાડા પર લઇ જતા શેઠ ભુરાભાઇ દ્વારા શીલને નુકસાન ન થાય તે રીતે ઉત્તમ ગુણવતાનો
12 ટન કોલસો કાઢી લઇ તેમાં નબળી
ગુણવતાનો કોલસો મીક્સ કરીને ફરી ટ્રેઇલરમાં શીલ લગાવ્યું હતું. એમ ભેળસેળવાળો માલ અલ્ટ્રાટેક
કંપનીમાં ખાલી કરવા જતો હતો ત્યારે પોલીસે વાહન અટકાવી સમગ્ર કારસ્તાનનો પર્દાફાશ કર્યો
હતો. ટ્રેઇલરમાંથી 12 ટન ઉત્તમ
ગુણવતાના ચોરી કરવામાં આવી હતી. જ્યારે 2.53 લાખનો મિક્સ કરેલો માલ અને 15 લાખનું ટ્રેઇલર કબજે કરી નલિયા પોલીસ મથકમાં ગુનો દાખલ કરવામાં
આવ્યો હતો. ચાલક ફિરોજ હાજર મળ્યો હતો. જ્યારે ગાંધીધામનો ભુરાભાઇ રબારી હાજર મળ્યો
નહતો.
