ગુપચુપ રીતે લગ્ન કરનાર નીરજ ચોપરાની દુલ્હનિયા હિમાની સ્પોર્ટસ ગર્લ

નવી દિલ્હી, તા. 20 : ઓલિમ્પિકમાં સુવર્ણ અને રજત ચંદ્રક જીતનાર અને વિશ્વવિજેતા ભાલાફેંક ખેલાડી નીરજ ચોપરાએ બે દિવસ પહેલાં હિમાચલ પ્રદેશમાં ગુપચુપ રીતે લગ્ન કર્યા છે, જેની જાણ ખુદ નીરજે રવિવારે રાત્રે સોશિયલ મીડિયા પર લગ્નના ત્રણ ફોટા પોસ્ટ કરી આપી હતી. તેની પત્નીનું નામ હિમાની મોર છે. જે હરિયાણાના સોનીપતની છે. હિમાની મોર ટેનિસ ખેલાડી રહી ચૂકી છે. 2017માં વિશ્વ જુનિયર ટેનિસ સ્પર્ધા રનર્સઅપ રહી હતી. હિમાની રાષ્ટ્રીય ટેનિસ ખેલાડી તરીકે પણ ભારત તરફથી કેટલીક મેચોમાં રમી ચૂકી છે. હાલ તે યુએસએમાં ન્યૂ હેમ્પશાયરમાં ફ્રેંકલીન પિયર્સ વિશ્વ વિદ્યાલયમાં સ્પોર્ટસ મેનેજમેન્ટની ડિગ્રીનો અભ્યાસ કરી રહી છે. દિલ્હીમાં તે સ્નાતક થઈ હતી. યુએસએમાં તે મહિલા ટેનિસની સહાયક કોચ તરીકે પણ કામ કરી ચૂકી છે. નીરજ ચોપરાએ તેના લગ્ન ખાનગી રાખ્યા હતા. તેના કાકા ભીમે જણાવ્યું કે લગ્ન બે દિવસ પહેલાં ભારતમાં થયા હતા. હાલ બન્ને હનીમૂન માટે વિદેશ ગયા છે.