હૃષિકેશ વ્યાસ તરફથી : અમદાવાદ, તા. 20 : રાજ્યપાલ આચાર્ય દેવવ્રતે ગુજરાત વિધાનસભાનું બજેટ સત્ર 19મી-ફેબ્રુઆરીના બુધવારથી યોજવા આહ્વાન કર્યું છે. આ બજેટ સત્ર 19મી ફેબ્રુઆરીથી 28મી માર્ચ સુધી ચાલશે. સત્રના પ્રથમ દિવસે બપોરના 12 વાગ્યે રાષ્ટ્રગીતની ધૂન બાદ રાજ્યપાલ વિધાનસભા ગૃહની બેઠકને સંબોધશે ત્યારબાદ સત્તાવાર રીતે ગૃહની બેઠકની શરુ થયા પછી સદ્દગત પૂર્વ ધારાસભ્યો-પૂર્વ મંત્રીઓને શોકાંજાલિ આપતો પ્રસ્તાવ પસાર કરાશે. સત્રના બીજા દિવસે 20મી, ફેબ્રુઆરીના ગુરુવારના પ્રથમ કલાકમાં પ્રશ્નોત્તરી બાદ નાણાંમંત્રી કનુભાઈ દેસાઈ પૂરક બજેટ રજૂ કર્યા બાદ ગુજરાત સરકારનું વર્ષ 2025-26ના વર્ષ માટે આશરે રુ. 3.70 લાખ કરોડનું અંદાજિત કદ ધરાવતું નવા નાણાંકીય વર્ષ માટેનું બજેટ રજૂ કરશે. આ બજેટ સત્ર 19મી ફેબ્રુઆરીથી 28મી માર્ચ સુધીના 38 દિવસ સુધી ચાલશે. જેમાં શનિવારની 5 અને રવિવારની 5 રજાઓને બાદ કરતાં 10 દિવસની રજાઓ ઉપરાંત અન્ય 2 રજાઓ રહેશે અર્થાત 26 દિવસ સુધી સત્ર ચાલશે. જેમાં 27 જેટેલી બેઠકો યોજાશે. જોકે, દરમ્યાનમાં કામકાજ સલાહકાર સમિતિની બેઠકમાં નક્કી થયા મુજબ ફેરફાર થઈ શકે છે. વિધાનસભાના અધ્યક્ષ શંકરભાઈ ચૌધરીના કહેવા મુજબ, આ સત્ર દરમ્યાન પ્રથમ દિવસે રાજ્યપાલના વિધાનસભા ગૃહને સંબોધન બાદ બજેટ રજૂ થયા પછીના દિવસે 3 દિવસ સુધી રાજ્યપાલના ગૃહને સંબોધન પરના આભાર પ્રસ્તાવ પર ચર્ચા થશે. જેમાં સત્તાધારી પક્ષ દ્વારા રાજ્યપાલના સંબોધનની પ્રશંસા કરશે તો, વિપક્ષ તેની ટીકા કરશે. આ ચર્ચા બાદ 4 દિવસ સુધી સરકારના રજૂ કરાયેલા બજેટ ઉપર સામાન્ય ચર્ચા થશે. એમાં પણ જો વિપક્ષ સમર્થ અને ધારાસભ્યો અભ્યાસુ હોય તો, રાજ્ય સરકારના વહીવટીની ઐસીતૈસી કરીને તેનો હિસાબ માંગી શકે છે પણ આ વખતે રાજ્ય વિધાનસભામાં વિપક્ષ-કોંગ્રેસના માત્ર 12 ધારાસભ્યોનું સંખ્યાબળ જોતાં, તેઓ કેટલી હદે સરકારને ઘેરી શકે છે, તે એક હાલ તો ચર્ચાનો જ વિષય છે. આ સત્રમાં 5 દિવસ સરકારી કામકાજ અને સરકારી વિધેયકો ચર્ચા બાદ પસાર કરાવાશે. 12 દિવસ રાજ્ય સરકારના વિવિધ વિભાગોના બજેટ પર ચર્ચા કરાશે અને અંતે તે પસાર કરાવાશે. રાજ્ય સરકારના 26થી વધુ વિભાગો જોતાં, એક દિવસમાં 2-3 વિભાગોની માંગણી (બજેટ) પરની રજૂઆત-ચર્ચા બાદ તે મંજૂર કરાશે. સત્ર દરમ્યાન દર ગુરુવારે પ્રશ્નોત્તરીના પ્રથમ કલાક બાદ બિન-સરકારી વિધેયકો અર્થાત શાસક-વિપક્ષના ધારાસભ્યો તરફથી જે તે સળગતાં પ્રશ્નોને લઈ વિધેયકો ચર્ચાશે. 28મીના શુક્રવારે વિધાનસભા સત્ર પૂરું થશે.
