ગાંધીધામ, તા. 22 : મોડવદર પુલ ઉપર બંધ પડેલા ડમ્પરમાં પાછળથી ટેન્કર ભટકાતાં ટેન્કરના ચાલક પ્રકાશ ગોરધન બિશ્નોઇ (ઉ.વ. 40)નું મોત થયું હતું જ્યારે અન્ય બેને ઇજાઓ પહોંચી હતી. શહેરનાં જીનામ લોજિસ્ટિકનું ડમ્પર નંબર જી.જે.-05-બી.વી.- 2355વાળું મોડવદર પુલ ઉપર બંધ પડી જતાં ચાલક શામજી દાફડાએ સુપરવાઇઝરને ફોન કર્યો હતો. બનાવના ફરિયાદી અને સુપરવાઇઝર નવીન પચાણ હુંબલ પોતાના મિકેનિક નરેશ ઉમેદરામ જાટીને લઇને ત્યાં ગયા હતા. ડમ્પરની આગળ શામજી અને નરેશ ઊભા હતા ત્યારે પાછળથી આવતાં ટેન્કર નંબર જી.જે. -12- બી.ઝેડ. -8827ના ચાલક પ્રકાશ બિશ્નોઇનું વાહન આ ડમ્પરમાં ભટકાતાં પ્રકાશને ગંભીર પ્રકારની ઇજાઓ પહોંચી હતી. જેમાં તેનું મોત થયું હતું. જ્યારે ટક્કરનાં કારણે ડમ્પર આગળ વધતાં આગળ ઊભેલા શામજી દાફડા અને નરેશ જાટીને પણ ગંભીર ઇજાઓ થતાં આ બંનેને સારવાર અર્થે લઇ જવાયા હતા. બનાવ અંગે પોલીસે ફરિયાદ નોંધી આગળની તપાસ હાથ ધરી છે.
