નોર્થ સાઉન્ડ (એન્ટીગા), તા. 14 : ઓમાન વિરુદ્ધ વિક્રમી 101 દડા બાકી રાખીને 8 વિકેટે આક્રમક જીત મેળવીને વર્તમાન ચેમ્પિયન ઇંગ્લેન્ડે તેની સુપર-8 રાઉન્ડની આશા જીવંત રાખી છે. ઓમાન ટીમ ગ્રુપ બીની આ મેચમાં 13.2 ઓવરમાં 47 રનમાં ઢેર થઈ ગઈ હતી. આ પછી ઇંગ્લેન્ડે માત્ર 3.1 ઓવરમાં 2 વિકેટ ગુમાવીને પ0 રન કરી એકતરફથી અને ઝડપી જીત મેળવી હતી. આ જીતથી ઇંગ્લેન્ડની નેટ રનરેટ પણ પ્લસ 3.081 થઈ છે જ્યારે આ ગ્રુપની બીજા નંબરની ટીમ સ્કોટલેન્ડની રન રેટ 2.164 છે. તેણે આખરી મેચ ઓસ્ટ્રેલિયા સામે રમવાની છે. જ્યારે ઇંગ્લેન્ડ આખરી મેચ નામીબિયા સામે રમશે. પ્લેયર ઓફ ધ મેચ આદિલ રશીદે 11 રનમાં 4 વિકેટ ઝડપી હતી. જ્યારે માર્ક વૂડે 12 રનમાં 3 અને જોફ્રા આર્ચરે પણ 12 રનમાં 3 વિકેટ લીધી હતી. ઓમાન તરફથી ફક્ત શોએબ ખાન (11) બે આંકડે પહોંચી શક્યો હતો. આ પછી 48 રનના મામૂલી વિજય લક્ષ્યનો પીછો કરતાં ઇંગ્લેન્ડના કપ્તાન જોસ બટલરે 8 દડામાં 4 ચોગ્ગા-1 છગ્ગાથી 24 રનની અણનમ ઇનિંગ્સ રમી હતી. ફિલ સોલ્ટે 3 દડામાં 12 રન અને જોની બેયરસ્ટોએ બે દડામાં અણનમ 8 રન કર્યા હતા.