કિડાણાના કુખ્યાત આરોપીને જિલ્લામાંથી હદપારીનો આદેશ

ગાંધીધામ, તા. 12 :  તાલુકાના કિડાણામાં રહેતો અને મિલકત સંબંધી ગુનામાં  સામેલ શખ્સને જિલ્લામાં તડીપાર કરાયો હતો. ગાંધીધામ બી-ડિવિઝન  પોલીસ દફ્તરે આરોપી  ઈમરાન ઉર્ફે ઈમલો ઈબ્રાહીમ કટિયા વિરુદ્ધ મિલકત સંબંધી  છ ગુના નોંધાયા હતા. પૂર્વ કચ્છ એલ.સી.બી. દ્વારા આ શખ્સ વિરુદ્ધ હદપારીની દરખાસ્ત તૈયારી કરાઈ હતી. અંજારના સબ ડિવિઝનલ મેજિસ્ટ્રેટે આ દરખાસ્તને ગ્રાહ્ય રાખીને  શખ્સને કચ્છ અને કચ્છને અડી આવેલા જિલ્લામાંથી હદપાર કરવા આદેશ આપ્યો હતો. એલ.સી.બી. પોલીસે  આ આરોપીને હસ્તગત કરીને હદપારી હુકમની બજવણી કરાવી હતી.