ભુજ, તા. 28 : દોઢેક વર્ષ પૂર્વે ગઢશીશાની વાહન સ્પેરપાર્ટસની દુકાન ઉપર કાઉન્ટર પરથી ચોરાયેલા મોબાઇલનો ગામનો જ એક શખ્સ ઉપયોગ કરતો હોવાનું સામે આવતાં ઉપયોગ કરનારને આ ચોરાઉ મોબાઇલ સાથે એલસીબીએ ઝડપી આ કેસનો ભેદ ઉકેલ્યો છે. આ કેસની વિગતો મુજબ પદમપુરમાં રહેતા ગઢશીશામાં ઓટોમોબાઇલની દુકાન ધરાવતા હીરાલાલ હંસરાજ પટેલે કાઉન્ટર પર રાખેલો મોબાઇલ તા. 1/9/22ના ચોરી થયાની ફરિયાદ તા. 8/3/23ના ગઢશીશા પોલીસ મથકે નોંધાઈ હતી. દરમ્યાન, એલસીબીને બાતમી મળી હતી કે, આ ચોરીમાં ગયેલો મોબાઇલ ફોન હાલે નાથા હંસરાજ ગોહિલ (રહે. પ્રતાપનગર, ગઢશીશા) ઉપયોગ કરી રહ્યો છે જેના આધારે એલસીબીએ તપાસ કરતાં નાથાને પકડી તેના પાસેના મોબાઇલના આધાર-પુરાવા માગતાં તે આપી શક્યો ન હતો. આથી 26,000ના મોબાઇલ સાથે તેની અટક કરી કાયદેસરની કાર્યવાહી કરવામાં આવી છે.
