ભુજ, તા. 25 : માંડવીમાં લોન કરાવી દેવાના બહાને ગૂગલ-પે અને પેટીએમથી ટુકડે ટુકડે રૂા. 83,400 મેળવી બાદમાં લોન ન કરાવી આપી અને નાણાં પણ પરત ન કરતાં છેતરપિંડી-વિશ્વાસઘાતની ફરિયાદ નોંધાઇ છે. આ અંગે માંડવી પોલીસ મથકે હનાન યુનુસ જુણેજાએ નોંધાવેલી ફરિયાદ મુજબ 2023 જુલાઇ માસમાં માંડવીની પી.જી.વી.સી.એલ. કચેરીમાં વીજ જોડાણનાં નામ ટ્રાન્સફરને લઇને આરોપી મોસીનખાન ઇકબાલખાન પઠાણ સાથે પરિચય થયો હતો. આ બાદ આરોપીએ 18 લાખની લોન કરાવી આપવાની વાત કરી ફરિયાદીને વિશ્વાસમાં લઇ લોનના બહાને 26 જુલાઇથી 15મી ઓગસ્ટ સુધી ગૂગલ-પે અને પેટીએમથી કુલે રૂા. 83,400 ફરિયાદીએ આરોપીને આપ્યા બાદ આરોપી ગોળ-ગોળ જવાબો આપતો હતો. આમ, નાણાં મેળવી લીધા બાદ લોન ન કરાવી આપી અને આપેલાં નાણાં રૂા. 83,400 પણ પરત ન આપતાં છેતરપિંડી-વિશ્વાસઘાત કર્યાની ફરિયાદ નોંધાવી છે.
