ભુજ, તા.3 : સીઆઈએસએફની `સલામત સમુદ્ર કિનારા, સમૃદ્ધ ભારત'ની થીમ ઉપર ઐતિહાસિક પહેલ `ગ્રેટ ઈન્ડિયન કોસ્ટલ સાયકોલોથોન 2025'નો ભવ્ય સમાપન સમારોહ તાજેતરમાં કન્યાકુમારી ખાતે યોજાયો હતો. વિવેકાનંદ રોક મેમોરિયલ અને તિરુવલ્લુવરની પ્રતિમા પાસે આયોજિત આ ભવ્ય સમાપન કાર્યક્રમમાં મુખ્ય મહેમાન તરીકે સીઆઈએસએફના મહા નિર્દેશક મુખ્ય મહેમાન તરીકે હાજર રહ્યા હતા. આ પ્રસંગે, સહભાગીઓએ દરિયાકાંઠાના વિસ્તારોની સુંદરતા અને મહત્વ પર પ્રકાશ પાડ્યો અને પર્યાવરણીય સંરક્ષણ અને સ્વસ્થ જીવનશૈલી પ્રત્યે જાગૃતિ ફેલાવવા પર ભાર મૂક્યો હતો. આ સાયક્લોથોન ભારતના વિશાળ દરિયાકાંઠાના રક્ષણ માટે દરિયાકાંઠાના સમુદાયો સાથે ભાગીદારીની શરૂઆત દર્શાવે છે. આ અભિયાને દરિયાકાંઠાની સુરક્ષા અને ટકાઉ વિકાસ માટે એક નવી દિશા બતાવી છે, જે દેશના લાંબા દરિયાકાંઠાના રક્ષણ અને જાળવણીમાં મદદ કરશે. આ સાયક્લોથોનને સાત માર્ચ રોજ કેન્દ્રીય ગૃહમંત્રી અમિત શાહ દ્વારા વર્ચ્યુઅલી લીલી ઝંડી આપવામાં આવી હતી. આ પડકારજનક યાત્રામાં 14 મહિલા દળના સભ્યો સહિત 125 સમર્પિત સીઆઈએસએફ સાયકલ સવારોએ ભાગ લીધો હતો. આ સાયકલ સવારોએ 25 દિવસના સમયગાળામાં 11 રાજ્યો/કેન્દ્રશાસિત પ્રદેશો પાર કરીને કુલ 6,553 કિમીનું અંતર કાપ્યું હતું. સાયક્લોથોનના વિવિધ તબક્કામાં 1,200 થી વધુ સહભાગીઓએ ભાગ લીધો હતો. દેશના મુખ્ય દરિયાકાંઠાના શહેરો અને પારાદીપ બંદર, કોણાર્ક સૂર્ય મંદિર, ગેટવે ઓફ ઈન્ડિયા (મુંબઈ), વિશાખાપટ્ટનમ, મેંગલોર, ચેન્નાઈ, કોચીન અને પુડુચેરી જેવા મહત્વપૂર્ણ સ્થળોએ ભવ્ય સ્વાગત અને ધ્વજવંદન સમારોહનું આયોજન કરવામાં આવ્યું હતું, જેના કારણે સાયક્લોથોનનો સંદેશ વધુ અસરકારક અને વ્યાપક બન્યો હતો.સાયક્લોથોનનો ઉદ્દેશ્ય ભારતના દરિયાકાંઠા પરના વિવિધ સુરક્ષા જોખમો વિશે દરિયાકાંઠાના સમુદાયોને સંવેદનશીલ બનાવવાનો હતો, જેમાં ગેરકાયદેસર પ્રવૃત્તિઓ જેમ કે દાણચોરી (માદક દ્રવ્યો, શસ્ત્રો અને વિસ્ફોટકોની દાણચોરી), ઘૂસણખોરી સામે તકેદારીની જરૂરિયાત અને આ પર્યાવરણીય રીતે સંવેદનશીલ વિસ્તારોમાં પર્યાવરણીય સંરક્ષણના મહત્વ વિશે જાહેર જાગૃતિ ફેલાવવાનો સમાવેશ થાય છે. આ સાયક્લોથોને સીઆઈએસએફ અન્ય સુરક્ષા એજન્સીઓ અને દરિયાકાંઠાના સમુદાયો વચ્ચે સંચાર અને સહયોગને મજબૂત બનાવવામાં મહત્વપૂર્ણ ભૂમિકા ભજવી છે. આ સાયકલોથોને 11 રાજ્ય,કેન્દ્રશાસિત પ્રદેશનોના 58 દરિયા કાંઠાના સમયુદાયો સાથે જોડાઈ હતી. ગુજરાતના વિવિધ સમુદ્ર કાંઠાઓમાં કચ્છ સહિતના વિસ્તારોમાં સાયકલોથોન પહોંચી હતી. સાયક્લોથોન યાત્રા દરમિયાન મહત્વપૂર્ણ કાર્યક્રમો અને વાર્તાલાપનું આયોજન કરવામાં આવ્યું હતું. જેમાં 26 મુખ્ય કાર્યક્રમો અને 118 સ્થાનિક સંવાદોનો સમાવેશ થતો હતો,જેમાં લોકોએ મોટી સંખ્યામાં ભાગ લીધો હતો અને પોતાનો ઉષ્માભર્યો ટેકો આપ્યો હતો. આ સંવાદો દરમિયાન, દરિયાકાંઠાની સુરક્ષા અને દરિયાકાંઠાના જીવનના પડકારો પર કેન્દ્રિત ચર્ચાઓ દ્વારા વિચારો અને મંતવ્યોનું આદાન-પ્રદાન કરવામાં આવ્યું હતું.
