ભુજ, તા. 4 : અબડાસા તાલુકાના મોથાળાની જમવાની હોટેલમાં સ્ટાફ કમીના લીધે ગલ્લા પરથી માલિક ગ્રાહકોને પીરસવા જતાં તે દરમ્યાન ગલ્લામાંથી 12 હજાર સેરવાયાની ફરિયાદ નોંધાઈ છે. આ અંગે વાંકુના વીરભદ્રસિંહ વનરાજસિંહ જાડેજાએ નોંધાવેલી ફરિયાદ મુજબ તેની મોથાળા ચાર રસ્તા પાસે જયશ્રી માજીસા નામની જમવાની હોટેલ છે. ગત તા. 2/5ના રાત્રે આઠથી દસ ગ્રાહકો જમવા આવ્યા હતા અને હોટેલમાં કામ કરતા માણસો રજા પર હોવાથી વીરભદ્રસિંહ ગલ્લો મૂકી પીરસવામાં પરોવાયા હતા. આ દરમ્યાન કોઈ અજાણ્યા ચોર ઈસમે ગલ્લા પર હાથ મારી 12 હજારની ચોરી કર્યાની નલિયા પોલીસ મથકે ફરિયાદ નોંધાવી છે.
