બેંગ્લુરુ, તા. 17 : ભારત અને વેસ્ટ ઈન્ડિઝ વચ્ચેની
પાંચમી અને નિર્ણાયક ટી-20 આંતરરાષ્ટ્રીય
મેચ સતત વરસાદનાં કારણે રદ કરવી પડી છે. આ મેચનું કોઈ પરિણામ ન આવતાં પાંચ મેચોની શ્રેણી
2-2ની બરાબરી પર સમાપ્ત થઈ છે.
આ સાથે જ ભારતીય ટીમ પોતાના જ ઘરઆંગણે ચાર વર્ષ બાદ દ્વિપક્ષીય ટી-20 શ્રેણી જીતવામાં નિષ્ફળ રહી
છે. આજે ટોસ પહેલા જ ધોધમાર વરસાદ પડ્યો હતો. જેના કારણે ટોસ મોડો ઉછાળવામાં આવ્યો
હતો. આ સાથે મેચની ઓવર ઘટાડી 9-9 કરવામાં આવી
હતી. ભારતે પ્રથમ દાવ લીધો હતો. ભારતીય બેટ્સમેનોએ શરૂઆતથી જ આક્રમક અભિગમથી 7.4 ઓવરમાં 5 વિકેટે 118 રનનો સ્કોર ખડક્યો હતો. ઈશાન કિશને 300ના સ્ટ્રાઈક રેટથી બાટિંગ કરતાં
માત્ર 10 બોલમાં 30 રનની ઝંઝાવાતી ઈનિંગ્સ રમી
હતી. કેપ્ટન શ્રેયસ ઐયરે 14 બોલમાં 22 રનનું યોગદાન કર્યું હતું.
નમન ધીરે 24 રન બનાવ્યા હતા. આઠમી ઓવરમાં
ફરી વરસાદ શરૂ થતાં મેચને રદ્દ કરાઈ હતી. આ મુકાબલો રદ થતાં ટીમ ઈન્ડિયાનો અપરાજિત
સિલસિલો અટકી ગયો છે અને ટ્રોફી બંને ટીમો વચ્ચે વહેંચાઈ ગઈ છે. ભારતે આ શ્રેણીનો શાનદાર
પ્રારંભ કર્યો હતો. તેણે વેસ્ટ ઈન્ડિઝને આઠ વિકેટથી કારમી હાર આપી હતી. તે પછી વેસ્ટ
ઈન્ડિઝે શાનદાર વાપસી કરતાં છ વિકેટથી બીજો મુકાબલો પોતાના નામે કર્યો હતો. ભારતે ત્રીજી
મેચમાં વેસ્ટ ઈન્ડિઝને 14 રનથી હરાવીને
શ્રેણીમાં સરસાઈ મેળવી લીધી હતી. જોકે, વેસ્ટ ઈન્ડિઝે હૈદરાબાદમાં ભારતને 24 રનથી હરાવીને શ્રેણી ફરી એકવાર બરાબરી પર લાવીને મૂકી દીધી હતી.
