કલેક્ટરના અધ્યક્ષ સ્થાને ભુજ ખાતે અનુસૂચિત જાતિ પેટા યોજનાની સમીક્ષા બેઠક યોજાઇ

ભુજ, તા. 31 : કલેક્ટર આનંદ પટેલના અધ્યક્ષસ્થાને  કલેકટર કચેરી ખાતે અનુસૂચિત જાતિ કલ્યાણ માટેની અનુસૂચિત જાતિ પેટા યોજના અમલીકરણ સમિતિની સમીક્ષા બેઠક યોજાઇ હતી. આ બેઠકમાં અનુસૂચિત જાતિ પેટા યોજના હેઠળ થયેલા ખર્ચની સમીક્ષા તથા વિવિધ યોજના હેઠળ લાભાન્વિત લાભાર્થીઓનું સહવર્તી મૂલ્યાંકન કરવામાં આવ્યું હતું. કચ્છ જિલ્લા માટેની રૂા. 5773.81 લાખની જોગવાઇ સામે રૂા. 4073.69 લાખની ગ્રાન્ટમાંથી જૂન-2025 અંત સુધીમાં રૂા. 2979.08 લાખનો ખર્ચ થયો હોવાની માહિતી બેઠકમાં રજૂ કરાઇ હતી. જિલ્લા ગ્રામ વિકાસ એજન્સી, કુટિર ઉદ્યોગ, ખેતીવાડી, બાગાયત, પશુપાલન વિભાગ, સિંચાઇ શાખા,પોષણ કાર્યક્રમ સહિતના વિવિધ અમલીકરણ વિભાગોની કામગીરીની સમીક્ષા કરવામાં આવી હતી. આ તકે કલેકટર આનંદ પટેલે તમામ અમલીકરણ અધિકારીઓને ફાળવાયેલી રકમ અનુસૂચિત જાતિના લાભાર્થીઓ પાછળ જ થાય તેની પૂરતી કાળજી રાખવા સૂચના આપી હતી.બેઠકમાં ધારાસભ્યો તથા સમિતિના સભ્યોએ યોજનાકીય લાભો ઝડપથી મળે તે માટે રજૂઆત કરી હતી. આજની બેઠકમાં જિલ્લા પંચાયત પ્રમુખ જનકાસિંહ જાડેજા, ધારાસભ્ય કેશુભાઇ પટેલ, ત્રિકમભાઇ છાંગા, પ્રદ્યુમનાસિંહ જાડેજા, સામાજિક ન્યાય સમિતિના ચેરમેન કુંવરબેન મહેશ્વરી, રામજીભાઇ ધેડા, રમેશભાઇ મહેશ્વરી, ગાવિંદભાઇ મારવાડા, સામજી વાણિયા, પશ્ચિમ કચ્છ એસ.પી. વિકાસ સુંડા, જિલ્લા વિકાસ અધિકારી ઉત્સવ ગૌતમ, અનુસૂચિત જાતિ કલ્યાણની કચેરીના નાયબ નિયામક વિનોદ રોહિત તથા અન્ય અમલીકરણ અધિકારીઓ હાજર રહ્યા હતા.