ગાંધીધામ, તા. 17 : ભુજના વોકળા ફળિયામાં આવેલી
એક હોલસેલ વેપારીની દુકાનને નિશાન બનાવી નિશાચરે રૂા. 1,99,000ની કિંમતના પાન, બીડી, મસાલાના કટ્ટાની
ચોરી કરી હતી. સી.સી.ટી.વી. કેમેરા તપાસ કરતા ચોરીનો આ બનાવ પ્રકાશમાં આવ્યો હતો. ભુજના
ઉમેદનગરમાં રહી વોકળા ફળિયામાં સલાટ ડેળી પાસે કૌશલ ટ્રેડર્સ નામની પાન, મસાલાની જથ્થાબંધની દુકાન ચલાવતા કૌશલ વિનોદ ગણાત્રએ આ બનાવ અંગે પોલીસ મથકે
ફરિયાદ નોંધાવી હતી. દુકાનમાં પાન, મસાલાનો મોટો જથ્થો રાખતા
આ ફરિયાદી યુવાન આજે દુકાને હતો ત્યારે અમુક કટ્ટા ન દેખાતા તેણે દુકાનમાં લાગેલા સી.સી.ટી.વી.ના
ફૂટેજ તપાસ્યા હતા. જેમાં તા. 20/5થી 16/6 દરમિયાન એક
નિશાચર આ દુકાનમાં આવતો હોવાનું બહાર આવ્યું હતું. આ તસ્કરે દુકાનના પતરા ખોલી અંદર
ખાબકતો હતો અને અંદરથી જુદા-જુદા દિવસે કટ્ટા લઈ જતો હોવાનું બહાર આવ્યું હતું. રૂા.
1,99,000ના પાન, બીડી, મસાલાના કટ્ટાની
ચોરી અંગે પોલીસે ગુનો નોંધી આ નિશાચરને પકડી પાડવા આગળની કાર્યવાહી હાથ ધરી છે.
