કેરા (તા. ભુજ), તા. 5 : મોટા શહેરોમાં
વેકેશનમાં તરણ, સંગીત, રમતગમતના વર્ગોમાં બાળકોને મોકલતા હોય છે. ઘણા વાલીઓની ફરિયાદ રહે છે કે,
પોતાનું બાળક મોબાઈલમાં જ પરોવાયેલું રહે છે તે વચ્ચે સૂરજપરમાં એક યુવાન
દરરોજ 50 જેટલા યુવક-યુવતીઓને પદ્ધતિસરનું
ક્રિકેટ કોચિંગ આપી આગળ વધારે છે. વાત છે ચોવીસીના સૂરજપર ગામની. અહીંના શ્રીહરિ સ્પોર્ટ્સ
મેદન પર મોર્નિંગ ક્રિકેટ કોચિંગ નિ:શુલ્ક ચાલે છે. જાદવજી વેકરિયા ક્રિકેટનો ધૂની
યુવાન છે. પોતે સારો બેટ્સમેન રહી ચૂક્યો છે. તેણે પોતાનાં ગામમાં જ આ પ્રવૃત્તિ શરૂ
કરી છે. ગ્રામ્ય કક્ષાએ વેકેશનમાં નિયમિત ચાલતી તાલીમ માટે આ યુવાને નોકરી છોડી દીધી
છે. તે કહે છે સવારે વહેલા ઊઠી ગ્રાઉન્ડ પર આવી જવાનું. શરૂઆતમાં ગામના છ-સાત બાળક
આવતાં હતાં. હાલ નારાણપરથી સાત દીકરી આવે છે, હવે તો અમુક વાલીઓ કિટ લઈને મોકલે છે. આ યુવાન તાલીમ આપી પોતાના ખર્ચે ખેલાડીઓને ગાંધીધામ સુધી લઈ જાય છે. આજકાલ
આવા કોચિંગ માટે વાલીઓ રૂપિયા 5ણ ખર્ચવા તૈયાર રહે
છે. અહીં તાલીમ પામેલા અન્ડર 14-17માં પણ રમવા
ગયા છે, જેમાં ક્રિશ વેકરિયા, જનક પિંડોરિયા, પાર્થિવ મેપાણી, રિષિ હાલાઈ આગળ વધ્યા છે. જનક પિંડોરિયા તો આફ્રિકા-દુબઈ સુધી રમ્યો છે. એસજીવીપી
રિબડા પણ ગયા છે. શારીરિક રીતે સક્ષમ કરવા વ્યાયામ કરાવાય છે. માંડવીની દીકરી ઈશિકા
પિંડોરિયા સૌરાષ્ટ્ર અન્ડર-17માં પણ રમી છે. ગ્રામ્યકક્ષાએ પદ્ધતિસરની તાલિમ ખરેખર આશાનું
કિરણ બની છે.
