રાજકોટ તા.10 : આયરલેન્ડ
સામે પ્રથમ વન ડેમાં ભારતીય મહિલા ટીમનો 93 દડા બાકી રહેતા 6 વિકેટે શાનદાર વિજય થયો
હતો અને 3 મેચની શ્રેણીમાં 1-0થી આગળ થઇ છે. અહીંના નિરંજન શાહ સ્ટેડિયમ પર ખુશનુમા
વાતાવરણ અને દર્શકોની ભરચક ઉપસ્થિતિ વચ્ચે રમાયેલી મેચમાં પહેલો દાવ લેનાર આયરલેન્ડ
ટીમે પ0 ઓવરમાં 7 વિકેટે 238 રનનો સ્કોર કર્યો હતો. જવાબમાં ભારતીય મહિલા ટીમે
34.3 ઓવરમાં 4 વિકેટે 241 રન કરી 6 વિકેટે જીત હાંસલ કરી હતી. ભારતીય યુવા ઓપનર પ્રતિકા
રાવલે 89 રનની સંગીન ઇનિંગ રમી હતી અને પ્લેયર ઓફ ધ મેચ બની હતી. આઇરીશ કેપ્ટન ગેબી
લૂઇસની 92 રનની ઇનિંગ બેકાર ગઇ હતી. 239 રનનો પીછો કરવા ઉતરેલી ભારતીય ટીમે સારી શરૂઆત
કરી હતી. કપ્તાન સ્મૃતિ મંધાના અને પ્રતિકા રાવલે પહેલી વિકેટમાં 61 દડામાં 70 રનની
ઝડપી ભાગીદારી કરી હતી. સ્મૃતિ મંધાના ફકત 29 દડામાં 6 ચોગ્ગા-1 છગ્ગા સાથે 41 રને
આઉટ થઇ હતી. હરલીન દેઓલે 20 અને જેમિમાહ રોડ્રિગ્સે 9 રન કર્યાં હતા. આ પછી પ્રતિકા
રાવલ અને તેજલ હસબનિસ વચ્ચે ચોથી વિકેટમાં 84 દડામાં 116 રનની મેચ વિનિંગ ભાગીદારી
થઈ હતી. પ્રતિકા રાવલ 96 દડામાં 10 ચોગ્ગા-1 છગ્ગા સાથે 89 રને આઉટ થઇ હતી. તેજલ 46
દડામાં 9 ચોગ્ગા સાથે પ3 અને ઋચા ઘોષ 8 રને નોટઆઉટ રહી હતી. ભારતે 34.3 ઓવરમાં 4 વિકેટે
241 રન કરી 6 વિકેટે સરળ વિજય નોંધાવ્યો હતો.
