ભુજ રનર્સના સભ્યોએ દોડીને ભુજથી માતાના મઢ યાત્રા કરી

મુંદરા,  તા. 23 : નવરાત્રિ અવસરે ગુજરાત સહિત દેશના વિવિધ પ્રદેશોમાંથી લાખો શ્રદ્ધાળુએ માતાના મઢ ખાતે મા આશાપુરાનાં ચરણોમાં શીશ ઝુકાવ્યા અને અનેક શ્રદ્ધાળુઓએ પદયાત્રા કરી દર્શનનો લાભ લીધો હતો. આ દરમિયાન, ભુજ રનર્સના સભ્યોએ ભુજથી માતાના મઢ સુધીની કઠિન યાત્રા દોડીને પૂર્ણ કરી એક વિશિષ્ટ સિદ્ધિ હાંસલ કરી હતી. આ યાત્રા પૂર્ણ કરવામાં ઓછામાં ઓછા 17 કલાકનો સમય લાગ્યો હતો. આ સાહસિક યાત્રા દ્વારા તેમણે શ્રદ્ધા, શારીરિક ક્ષમતા, સહનશક્તિ અને દૃઢ મનોબળનું ઉદાહરણ પૂરું પાડયું હતું. આ યાત્રામાં માનકૂવાના આનંદ બારમેડા, સીએ જગદીશ હિરાણી અને હાર્દિક અબોટી, ભુજના ગુલાબરાવ ભૂટેકર અને પવન પરમાર તથા માધાપરના ગૌરાંગ જોશી જોડાયા હતા. આમ,  આ અનોખી પહેલ દ્વારા ભુજ રનર્સના સભ્યોએ રમતગમત સાથે ધાર્મિક શ્રદ્ધાનો સુંદર સમન્વય રજૂ કર્યો હતો.