ઘનશ્યામ મજીઠિયા દ્વારા : રાપર, તા. 15 : રાપરમાં કરોડોના ખર્ચે ગુજરાત પાણી પુરવઠા બોર્ડ દ્વારા નિર્મિત ગટરનાં પાણી શુદ્ધિકરણ પ્લાન્ટ (સીવેજ ટ્રીટમેન્ટ પ્લાન્ટ) તંત્રની ઘોર બેદરકારીને કારણે એક વર્ષથી તૈયાર હોવા છતાં શરૂ કરવામાં ન આવતાં કરોડોની મશીનરી ધુળ ખાઈ રહી છે. માત્ર લાખોની કીમતની મશીનરી નાખવામા મુદે કામ અટકયું હોવાથી પાલિકા હસ્તગત કરતી ન હોવાના અહેવાલો સાંપડી રહ્યા છે. સિંચાઈનાં પાણી માટે સદાય તરસ્યા એવાં વાગડનાં રાપરની ભાગોળે આવેલો આ પ્રોજેક્ટ ખેડૂતો માટે આશીર્વાદરૂપ સાબિત થઈ શકે તેમ છે. કચ્છમિત્રએ આ પ્લાન્ટની રૂબરૂ મુલાકાત લેતાં આ પ્લાન્ટની મશીનરી ચાલુ ન હોવાથી ધુળ ખાતી જોવા મળી હતી. વિશાળ પાઈપો પાથરીને તેના દ્વારા ગટરનાં દૂષિત પાણીને શુદ્ધ કરી સિંચાઇ માટે ઉપયોગમાં લેવામાં આવે તો આ વિસ્તારના ખેડૂતો માટે પાણીનો એક નવો જ સ્ત્રોત ઉભો થઇ શકે તેમ છે. આ પ્લાન્ટ અંગે તેની ઠેકેદાર કંપની માંગુકીયા બ્રધર્સના ભૌતિક પટેલનો સંપર્ક કરતાં તેમણે ગત વર્ષના એપ્રિલ મહિનામાં જ આ પ્લાન્ટ તૈયાર કરી પાણી પુરવઠા બોર્ડને હેન્ડઓવર કરી દીધો હોવાનું તેમણે જણાવ્યું હતું તો પાણી પુરવઠા બોર્ડના ઈજનેર જે.કે. કપાસીયાએ નગરપાલિકા પમ્પિંગ સ્ટેશન સુધી પાણી નથી પહોંચાડતી અને એટલે આ પ્લાન્ટ કાર્યરત નથી થઈ શકતો એમ જણાવી નગરપાલિકાને ખો આપી હતી. આ પ્લાન્ટ કાર્યરત કરવા માટે માત્ર પાંચ દશ લાખની પમ્પિંગ મશીનરી નથી અને એ માટે આખો મસમોટો આ પ્રોજેક્ટ નકામો પડ્યો છે. આ અંગે નગરપાલિકાના પુર્વ પ્રમુખ હઠુભા સોઢા અને પુર્વ ઉપપ્રમુખ બળવંતભાઈ ઠક્કરે ધારાસભ્ય વિરેન્દ્રાસિંહ જાડેજાને રૂબરૂ મળી આ પ્લાન્ટ જલ્દીથી કાર્યરત કરવા રજૂઆત કરી હોવાનું જણાવ્યું હતું. હાથી આખેઆખો હાલ્યો જાય અને પૂંછડે આવીને અટકે તેમ પંદર કરોડનો પ્લાન્ટ માત્ર પાંચ દશ લાખની પમ્પિંગ મશીનરી માટે શરૂ ન થાય તે કેવી કરુણતા કહેવાય! જો કે પાણી પુરવઠા બોર્ડના અધિકારી શ્રી કપાસીયાએ નગરપાલિકા સાથે સંકલન કરી જલ્દીથી આ પ્લાન્ટ કાર્યરત કરવાની હૈયાધારણા આપી હતી. નર્મદા કેનાલ બંધ થાય તો પણ જો આ યોજના ચાલુ થાય તો સ્થાનિકના ખેડૂતોને પાણીનો વિકલ્પ મળી રહે અને એટલે જ આ પ્લાન્ટ જલ્દીથી શરૂ થાય તેમ ખેડૂતો ઈચ્છી રહ્યા છે. જાણકારોના જણાવ્યા પ્રમાણે જો આ પ્લાન્ટ ચાલુ કરવા માટે હજુ પણ જો ધ્યાન નહીં દેવામાં આવે તો 15 કરોડનો ખર્ચ નિષ્ફળ જવાની ભીતી વ્યકત થઈ રહી છે. જો આ પ્લાન્ટ કાર્યરત થઈ જાય તો પ્રતિદિન પાંચ એમ.એલ.ડી શુધ્ધીકરણ કરેલું પાણી ખેતી માટે ફાળવી શકાય અને તેના કારણે નગરપાલિકાની તળિયાઝાટક સ્થિતિને મજબુત બનાવી શકાય તેમ છે.
