ચીન સાથે સ્થિતિ `સામાન્ય' નહીં : સેનાધ્યક્ષ ઉપેન્દ્ર દ્વિવેદી

નવી દિલ્હી, તા.1 :  ભારતીય સેનાના પ્રમુખ જનરલ ઉપેન્દ્ર દ્વિવેદીએ આજે જણાવ્યું હતું કે ચીન સાથેની વાસ્તવિક નિયંત્રણ રેખા (એલએસી) પર સ્થિતિ હજુ પણ સંવેદનશીલ છે અને `સામાન્ય' નથી. ચાણક્ય રક્ષા સંવાદમાં સંબોધન દરમ્યાન દ્વિવેદીએ જણાવ્યું હતું કે ચીનની સાથે ચાલી રહેલા સીમા વિવાદ પર સેનાની તૈયારીઓ અને વ્યૂહનીતિ પર પણ પ્રકાશ ફેંક્યો હતો. તેમણે કહ્યું કે ભારત-ચીન સીમા પર સ્થિતિ સ્થિર છે પરંતુ એપ્રિલ-2020થી પહેલા જેવી સામાન્ય સ્થિતિની બહાલીની જરૂરત છે.  જનરલ દ્વિવેદીએ કહ્યું કે ચીનની સાથે પ્રતિસ્પર્ધા, સહયોગ, સહ-અસ્તિત્વ અને ટક્કરની સ્થિતિ જારી છે. એપ્રિલ-2020માં ચીને ભારતીય ક્ષેત્ર પર કબજાનો પ્રયાસ કર્યો હતો જેને ભારતીય સેનાએ નિષ્ફળ બનાવ્યો હતો. જોકે આ ઘટના બાદથી પૂર્વી લદ્દાખમાં તણાવ ચાલુ છે. તેમણે કહ્યું કે વિશ્વાસની સૌથી મોટી ક્ષતિ બંને દેશ વચ્ચે સર્જાઈ છે. જ્યાં સુધી એપ્રિલ 2020 અગાઉની સ્થિતિ ન સ્થપાય ત્યાં સુધી બંને દેશ વચ્ચે સ્થિતિને સામાન્ય માની ન શકાય એમ જનરલ દ્વિવેદીએ જણાવ્યું હતું.