એક પણ રન વિના પ્લેયર ઓફ ટૂર્નામેન્ટ : બુમરાહનો અનોખો વિક્રમ

નવી દિલ્હી, તા. 3 : આઇસીસી ટી-20 વર્લ્ડકપ 2024 સ્પર્ધા હાલમાં જ પૂરી થઇ અને ભારતે ખિતાબ જીતી લીધો, જેમાં બોલરોનો જબરદસ્ત દેખાવ જોવા મળ્યો હતો. જસપ્રીત બુમરાહ પ્લેયર ઓફ ધ ટૂર્નામેન્ટ  જાહેર થયો. બુમરાહે આ એવોર્ડ જીતતાની સાથે જ એક અનોખો વર્લ્ડ રેકોર્ડ પણ પોતાનાં નામે કર્યો હતો. બુમરાહે કંઇક એવું કરીને દેખાડયું છે કે જે પુરુષ કે મહિલા ટી-20 વર્લ્ડકપમાં મળીને પણ કોઇ કરી શકયું નથી. બુમરાહ ટી-20 વર્લ્ડકપ ઇતિહાસનો પહેલો એવો ખેલાડી બન્યો છે જે પ્લેયર ઓફ ધ ટૂર્નામેન્ટ તો બન્યો પરંતુ તેના ખાતામાં એક પણ રન નથી. ટૂર્નામેન્ટમાં બુમરાહને ફકત એક જ વખત બેટિંગ કરવાની તક મળી અને તેમાં તે ગોલ્ડન ડકનો ભોગ બન્યો હતો. બુમરાહે ટી-20 વિશ્વકપમાં કુલ 15 વિકેટ લીધી અને ટીમ ઇન્ડિયાના સૌથી મોટા ગેમ ચેન્જર તરીકે ઉભરી આવ્યો હતો. બુમરાહ અગાઉ વન-ડે વિશ્વકપમાં બે ખેલાડીઓ એવા રહ્યા છે જેઓ એક પણ રન કર્યા વગર પ્લેયર ઓફ ધ ટૂર્નામેન્ટ બન્યા હતા. ગ્લેન મેકગ્રાથે આ પરાક્રમ 2007 વર્લ્ડકપમાં કર્યું હતું. જ્યારે 11 મેચમાં તેને એક પણ મેચમાં બેટિંગ કરવાની તક મળી ન હતી. જ્યારે ઓસ્ટ્રેલિયાના જ મિશેલ સ્ટાર્કે પણ 2015ના વર્લ્ડકપમાં બેટિંગની તક મળી હતી, પરંતુ તેના બેટથી એક પણ રન થયો ન હતો અને મેન ઓફ ધ સિરીઝ બન્યો હતો.