ટાઇટન્સ વિ. રોયલ્સની ટક્કરમાં બોલર્સની પરીક્ષા

અમદાવાદ, તા. 8 : ગુજરાત ટાઇટન્સ અને રાજસ્થાન રોયલ્સ ટીમ બુધવારની મેચમાં આમને-સામને હશે. ટાઇટન્સના હાલ 4 મેચમાં 3 જીતથી 6 અંક છે. તે વધુ એક જીતથી પોઇન્ટ ટેબલ પર પોતાની સ્થિતિ મજબૂત કરવા માગશે. બીજી તરફ રોયલ્સ પાસે 4 અંક છે. આગળ જતાં જો અને તોની સ્થિતિથી બચવા તેના માટે જીત જરૂરી છે.  નરેન્દ્ર મોદી સ્ટેડિયમની સપાટ પીચ પર બન્ને ટીમના બોલર્સનો દેખાવ મહત્ત્વનો બની રહેશે. કારણ કે અહીં 200 આસપાસનો સ્કોર અપેક્ષિત માનવામાં આવે છે. ગુજરાત ટાઇટન્સ તરફથી ઝડપી બોલર મોહમ્મદ સિરાજ અને સ્પિનર સાઇ કિશોર શાનદાર દેખાવ કરી રહ્યા છે.  જો કે ટીમના મિસ્ટ્રી સ્પિનર રાશિદ ખાન અને અનુભવી ઇશાંત શર્માનું ખરાબ ફોર્મ ટાઇટન્સને ભારે પડી રહ્યંy છે. રાજસ્થાન સામેની મેચમાં ઇશાંત લગભગ બહાર થઇ શકે છે. બીજી તરફ રાજસ્થાન રોયલ્સ માટે રાહતની વાત એ છે કે તેનો સ્ટાર બેટર યશસ્વી જયસ્વાલ ફોર્મ વાપસી કરી ચૂક્યો છે. જ્યારે રિયાન પરાગ પણ રન કરી રહ્યો છે. રોયલ્સની ચિંતા બોલિંગ છે. સંદીપ શર્માને છોડીને કોઇ બોલરમાં નિરંતરતા જોવા મળી નથી.  કપ્તાન સંજુ સેમસન મોદી સ્ટેડિયમની સપાટ વિકેટ પર પાવરપ્લેમાં પાવર હિટિંગની રણનીતિ રાખશે, પણ તેની સામે સિરાજનો કઠિન પડકાર હશે.