સેંચુરિયન, તા. 12 : ભારત-દક્ષિણ આફ્રિકા વચ્ચે રમાનારી ચાર
મેચની ટી-20 સિરીઝની ત્રીજી મેચ બુધવારે ભારતીય સમય મુજબ રાત્રે 8 વાગ્યે રમાનારી છે,
ત્યારે તેથી અગાઉની મેચમાં ભારતે હારનો સામનો કર્યા બાદ આફ્રિકાની ટીમ શ્રેણી 1-1 પર
બરાબર કરવામાં સફળ રહી હતી. હવે સિરીઝની ત્રીજી મેચમાં ભારતની નજર જીત મેળવી લીડ મેળવવા
પર ટકેલી છે. બીજી મેચમાં હારનો સામનો કરનારી ભારતીય ટીમ તેની લાઈનઅપ પર ફેરફાર કરવા
પર ધ્યાન આપશે. અભિષેક શર્માનું તાજેતરનું ફોર્મ ચિંતાનો વિષય છે અને ટીમ તિલક વર્માને
સંજુ સેમસન સાથે ઓપનિંગમાં ઉતારવા પર વિચાર કરી શકે છે, તો રમનદીપસિંહ પણ મિડલ ઓર્ડર
માટે એક વિકલ્પ બની શકે છે. ઉલ્લેખનીય છે કે, પહેલી ટી-20માં રોમાંચક જીત મેળવ્યા બાદ
ભારતને બીજી ટી-20માં હારનો સામનો કરવો પડયો હતો.
