ભચાઉ-દુધઈ ધોરીમાર્ગ ઉપર ઓવરબ્રિજ ઊતરતાં જ ખાડા

ભચાઉ, તા. 6 : જરા માત્ર વરસાદમાં શહેર અને હાઈવેના માર્ગોની હાલત ખખડધજ થઈ જવાના અનેક બનાવ બને છે. આ વીજ સ્થિતિ ભચાઉ દુધઈ રોડ ઉપર માતબર રકમના ખર્ચે બનાવાયેલા માર્ગની હાલત ગાડાંવાટ કરતા પણ બદતર બની જતા લોકોને ભારે મુશ્કેલી પડી રહી છે. ભુજ -દુધઈ રોડ  ઉપર રેલવે ફાટક ઉપર બનેલા ઓવરબ્રિજ નજીક થોડા વરસાદમાં જ મસમોટા ગાબડાં પડી ગયા છે, જે નબળા કામની ચાડી ખાય છે. ખાડામાં પાણી ભરાઈ જતા   અનેક વાહનો દિવસના પણ ખાડા ચુકી જતા અકસ્માતની દહેશત સતાવી રહી છે. ભુજ-દુધઈ તરફથી પુલ ઉતરી ભચાઉ આવતા વાહનો માટે આ પ્રકારના ખાડાઓ જોખમી બની રહ્યા છે. સત્વરે કાર્યવાહી કરવામાં આવે તે સમયની માંગ છે.  રાત્રીના અરસામાં આ પ્રકારના ખાડાના કારણે જીવલેણ અકસ્માત સર્જાય તેવી દહેશત લોકોને સતાવી રહી છે. પુરપાટ ઝડપે આવતા વાહનો પાણી ભરાયેલા ખાડા ધ્યાનમાં ન  આવે તો જીવલેણ અકસ્માતની ભીતિ છે. અત્રે ઉલ્લેખનીય છે કે કરોડોના ખર્ચે બનેલા આ પુલના ઉદઘાટન દરમ્યાન પણ તીરાડો  પડી હોવાની  બાબત સામે આવી હતી. ટ્રાફીકની સુખાકારી માટે બનેલા આ પુલમાં રસ્તાના નબળા કામના કારણે હાલ  વાહન ચાલકોને મુશ્કેલી અનુભવાય છે. તંત્ર ગંભીર ઘટના પુર્વે ઘટતી કાર્યવાહી કરે તે સમયની માંગ હોવાનું જાણકારો જણાવી રહ્યા છે.