નવી દિલ્હી, તા.12 : મોંઘવારીના મોરચે આમ આદમીને ઓક્ટોબર મહિનામાં
પણ મોટો ઝાટકો લાગ્યો છે. ખાદ્ય ચીજવસ્તુઓ મોંઘી થવાને કારણે ઓક્ટોબરમાં છૂટક ફુગાવો
વધીને 6.21 ટકા થયો છે. આ મોંઘવારીનું 14 મહિનાનું સર્વોચ્ચ સ્તર છે. મોંઘવારીમાં આ
ઉછાળો ખાવા-પીવાની વસ્તુઓના વધેલા ભાવને કારણે છે. આ આંકડા આજે સરકારે જાહેર કર્યા
હતા. આ સાથે જ છુટક મોંઘવારી ભારતીય રિઝર્વ બેન્ક (આરબીઆઈ)ના છ ટકાના દાયરાની બહાર
ચાલી ગઈ છે. ગયા વર્ષે આ જ મહિનામાં સીપીઆઈ
આધારિત મોંઘવારી દર 4.87 ટકા હતો.આ પહેલાં ઓગસ્ટ-2023માં ફુગાવાનો દર 6.83 ટકા હતો.
જ્યારે ઓક્ટોબરના એક મહિના પહેલાં સપ્ટેમ્બરમાં શાકભાજીના ઊંચા ભાવને કારણે આ દર
5.49 ટકા પર પહોંચી ગયો હતો.
