ગાંધીધામ, તા. 1 : ભુજ તાલુકાના પદ્ધરમાં આવેલી લિગ્નાઈટ કોલસાનો
વ્યવસાય કરતી કંપની પાસેથી મહેસાણાની કંપનીએ લિગ્નાઇટ કોલસો ખરીદ્યા પછી રૂપિયા ન આપતાં
ડાયરેક્ટરો સહિત સાત સામે રૂા. 97.28 લાખની
છેતરાપિંડીની ફરિયાદ નોંધાઈ છે. આ બનાવ તા. 1 જાન્યુઆરી-2018થી
લઈને 31 ડિસેમ્બર-2023 દરમિયાન બન્યો છે. પદ્ધરમાં રહેતા અને ખેતીની
સાથે વ્યાપાર કરતા પ્રકાશભાઈ શિવજીભાઈ કોઠીવાર તેમના નાના ભાઈ મોહનભાઈની ગ્લોબલ ટ્રાડિંગ
કંપનીનો કારોબાર તથા લિગ્નાઇટ કોલસા અને ટ્રાન્સપોર્ટનો વ્યવસાય સંભાળે છે. તેમની પાસે
મહેસાણાના જાગુદળ રોડ ખેરવામાં આવેલ નીલકંઠ ક્રાફ્ટ પેપરમીલના ડાયરેક્ટર કમ ઓથોરાઈઝર
સંજય બાબુલાલ અને જગદીશ વિરમભાઈ પટેલ તેમજ અન્ય ડાયરેક્ટર જયંતી જીવરામદાસ પટેલ, રમેશ ઈશ્વરદાસ પટેલ,
રમેશ લલ્લુદાસ પટેલ, દેવેન્દ્ર હરગોવનદાસ પટેલ,
મુકેશ અંબાલાલ પટેલ છે, તે પૈકી સંજય અને જગદીશ
બંને વર્ષ 2018માં
પદ્ધર કંપનીની ઓફિસે પહોંચ્યા હતા અને મીલના બોઇલર માટે કોલસાની અને લિગ્નાઇટની જરૂર
હોવાથી તેમણે ખરીદી શરૂ કરી હતી. પ્રકાશભાઈ કોઠીવારને વિશ્વાસમાં લઈને આ સાત આરોપીએ
જરૂરિયાત મુજબ કોલસો ખરીદીને સમાંતરે ઊંચા ભાવ આપીને રૂપિયા ચૂકવી આપવામાં આવશે તેવું
કહીને વિશ્વાસ કેળવ્યો હતો. પરંતુ કોલસાની ખરીદી પેટેના 97,28,694 રૂપિયા હજુ સુધી આપ્યા ન હતા. વારંવાર માગણી
કરવા છતાં ભાગીદારોની મિટિંગ થશે તેમાં નિર્ણય લઈને ચૂકવી આપશું અને નોટરી પાસે લખાણ
કરીને તે પ્રમાણે ચેક આપશું તેમ કહ્યું હતું. લાંબો સમય વીતી જવા છતાં રૂપિયાની ચૂકવણી
ન કરતાં પ્રકાશભાઈએ છતરાપિંડીની ફરિયાદ નોંધાવી છે. પોલીસે ડાયરેક્ટરો સહિત સાત સામે
ગુનો નોંધીને તપાસ હાથ ધરી છે.
