ભુજ, તા. 20 : મુંદરા તાલુકાના રતાડિયાની
સીમમાં ધોરીમાર્ગ પરની હોટેલ ઉપર પાર્ક કરાયેલી ટ્રકમાંથી પ્રાગપર પોલીસે રૂા.16,41,978ના શરાબના જથ્થા સાથે બે ચાલકને
ઝડપી લીધા હતા. ગઇકાલે રાતે પ્રાગપર પોલીસ પેટ્રોલિંગમાં હતી ત્યારે બાતમી મળી કે, માંડવી-અંજાર રાષ્ટ્રીય ધોરીમાર્ગ ઉપર આવેલી
બાબા રામદેવ ચૌધરી હાઇવે હોટેલ રતાડિયા સીમ વિસ્તારમાં હોટેલના પાર્કિંગમાં શરાબનો
જથ્થો ભરેલી ટ્રક નં. જી.જે.-01- ડીએક્સ-8576વાળી પાર્ક
કરેલી છે. આથી પોલીસની ટીમે દરોડો પાડી રોયલ ચેલેન્જ વ્હીસ્કીની 750 એમએલની 1260 બોટલ, મેકડોવલ્સ વ્હીસ્કીની 120 બોટલ અને રોયલ ચેલેન્જ વ્હીસ્કીના
ક્વાર્ટરિયા નંગ 3403 એમ કુલ્લે
રૂા. 16,41,978ના શરાબના જથ્થા સાથે ટ્રક
કિં. રૂા. 10 લાખ અને બે મોબાઇલ કિં. રૂા.
10,000 એમ કુલ્લે રૂા. 26,51,978ના મુદ્દામાલ સાથે બે ચાલક
આરોપી સમીર નૂરમામદ જુણેજા (રહે. જામનગર) અને અસ્લમ ઓસમાણ કુરેશી (રહે. સંજોગનગર-ભુજ)ને
ઝડપી લીધા હતા. ટ્રકની આર. સી. બુક જોતાં માલિકનું નામ કાસમ કરીમ સમા (રહે. સુરલભિટ્ટ
રોડ, ભુજ) છે. પકડાયેલા સમીરને શરાબ ક્યાંથી લાવ્યા
તે અંગે પૂછતાં મહેસાણાના જોટાણા તાલુકાના કટોસણ ગામ પાસેથી રામભાઇ ઉર્ફે ઇન્દુ મારવાડીના
કહેવાથી ભરી અહીં લાવ્યા હતા અને ભુજ લઇ જવાતા હતા. પોલીસે ત્રણે આરોપી અને ટ્રક માલિક
તથા તપાસમાં જે ખૂલે તેની વિરુદ્ધ ગુનો દાખલ કરી કાયદેસરની કાર્યવાહી હાથ ધરી હતી.
આ કામગીરીમાં પ્રાગપરના પી.આઇ. એ. કે. ભરવાડના માર્ગદર્શન હેઠળ સર્વેલન્સ સ્ટાફના હે.કો.
ઇશ્વરકુમાર ચૌધરી, એ.એસ.આઇ. ગોપાલભાઇ મહેશ્વરી, રવજીભાઇ બરાડિયા, ગિરીશકુમાર ચૌધરી, હે.કો. અલ્પેશભાઈ પરમાર, યોગેશકુમાર પટેલ, કોન્સ કલ્પેશકુમાર માળી, હિતેશભાઇ કુંભાર, લાલજીભાઇ આલ, સામત ગિલવા તથા કલ્પેશભાઇ પરમાર જોડાયા
હતા.
