આદિપુરમાં ધોળા દિવસે મોબાઇલ ચોરીથી ચકચાર

ગાંધીધામ, તા. 2 : આદિપુરના મદનસિંહ ચોક પાસે આવેલી એક દુકાનમાં ઘૂસી ધોળા દિવસે તસ્કરોએ રૂા. 9000ના એક મોબાઇલની તફડંચી કરી હતી. આદિપુરમાં મદનસિંહ ચોક નજીક વોર્ડ 1-એ, પ્લોટ નંબર 180માં આવેલી ક્રિષ્ના ટેલિકોમ નામની દુકાનમાં ગઇકાલે બપોરના અરસામાં આ બનાવ બન્યો હતો. અહીં મોબાઇલ રિપેરિંગનું કામ કરનાર ફરિયાદી જગમલસિંહ શેરસિંઘ ભાટીને કામ હોવાથી બાજુની દુકાનમાં ગયો હતો. તેવામાં કોઇ શખ્સ તેની આ દુકાનમાં ઘૂસી રિપેરિંગ માટે આવેલા રૂા. 9000ના મોબાઇલની ચોરી કરી નાસી ગયો હતો. બનાવ અંગે ફરિયાદીએ ઓનલાઇન ફરિયાદ કર્યા બાદ પોલીસે ગુનો નોંધી આગળની કાર્યવાહી હાથ ધરી છે.