આડેસર નજીક ટ્રકમાં બનાવેલાં ચોરખાનાંમાંથી શરાબ જપ્ત

ભચાઉ, તા. 19 : આડેસર પોલીસ ચેકપોસ્ટ પાસેથી પોલીસે ટ્રકનાં ચોરખાનાંમાંથી દારૂ શોધી કાઢયો હતો. રૂા. 80,280નો આ દારૂ મોરબી જવાનો હતો. આડેસર ચેકપોસ્ટ પર આજે બપોરે પોલીસ વાહન ચેકિંગમાં હતી. દરમ્યાન ટ્રક નંબર આરજે-19-જીઇ-7358 આવતાં તેને રોકાવાઇ હતી. ટ્રકના ઠાંઠામાં જોવાતાં ચાઇનાક્લે (માટી) ભરેલી હતી, જ્યારે આગળ-પાછળના પૈડાં વચ્ચેના ભાગે બરોબર તપાસ કરતાં તેમાં ચોરખાનું મળ્યું હતું. આ ચોરખાનાંમાંથી રોયલ સ્ટેગની 47 બોટલ, ઓલ્ડ મોન્કની 3, બ્લેન્ડર્સ પ્રાઇડની 3, મહારાણી મહાન સર શાહી ગુલાબની 3 તથા બડવાઇઝરના 18 અને કિંગ ફિશરના 4 નંગ બિયરના ટીન એમ કુલ રૂા. 80,280નો શરાબ જપ્ત કરાયો હતો. પકડાયેલા ટ્રકચાલક પુખરાજ ઉમેદારામ જાટ (ચૌધરી)ની પૂછપરછ કરતાં આ માલ મોરબીના જાવેદ નામના શખ્સે મગાવ્યો હોવાનું બહાર આવ્યું હતું. આ દારૂ તે નાગોર ધોરીમાર્ગ ઉપર આવેલા દારૂના જુદા-જુદા ઠેકાઓ પરથી ખરીદી કરીને લાવ્યો હોવાનું બહાર આવ્યું હતું.