સેંટ વિન્સેટ,
તા.20: બાંગલાદેશે પહેલીવાર વેસ્ટ ઇન્ડિઝ વિરુદ્ધ ટી-20 સિરીઝમાં ક્લીનસ્વીપ કર્યું
છે. ગઇકાલે રમાયેલી ત્રીજી અને આખરી ટી-20 મેચમાં બાંગલાદેશનો વેસ્ટ ઇન્ડિઝ વિરુદ્ધ
80 રને સરળ વિજય થયો હતો. 190 રનના વિજય લક્ષ્યાંક સામે કેરેબિયન ટીમ 16.4 ઓવરમાં
109 રનમાં ડૂલ થઇ હતી. બાંગલાદેશના 20 ઓવરમાં 7 વિકેટે 189 રન થયા હતા. પ્લેયર ઓફ ધ
મેચ જાકેર અલીએ 41 દડામાં 3 ચોગ્ગા અને 6 છગ્ગાથી વિસ્ફોટક 72 રન કર્યાં હતા. પરવેઝ
હુસેને 39, મહેંદી હસન મિરાજે 29 રન કર્યાં હતા. વિન્ડિઝ તરફથી રોમારિયો શેફર્ડને
2 વિકેટ મળી હતી અને બાદમાં ટીમ તરફથી 33 રનની સર્વાધિક ઇનિંગ્સ રમી હતી. આ સિવાય જોનસન
ચાર્લ્સે 23, નિકોલસ પૂરને 1પ રન કર્યાં હતા. કપ્તાન રોવમેન પોવલ બે રને આઉટ થયો હતો.
બાંગલાદેશ તરફથી રિશાદ હુસેને સૌથી વધુ 3 વિકેટ લીધી હતી. મહેંદી અને તસ્કીનને 2-2
વિકેટ મળી હતી.
