નવી દિલ્હી, તા. 20 : રાજધાની દિલ્હીમાં
યોજાયેલી એઆઈ ઈમ્પેક્ટ સમિટ ભારતનાં ટેક્નોલોજી
અને આર્થિક વિકાસ માટે એક ઐતિહાસિક આયોજન સાબિત થઈ રહ્યું છે. કેન્દ્રીય માહિતી પ્રૌદ્યોગિકી
મંત્રી અશ્વિની વૈષ્ણવે આ આયોજનને મોટી સફળતા ગણાવી કહ્યું હતું કે, આ વૈશ્વિક મહાસંમેલનમાં માત્ર ઇન્ફ્રાસ્ટ્રક્ચર
માટે 250 અબજ ડોલરથી વધુનું રોકાણ પ્રાપ્ત
થયું અને 70 દેશોએઁ ભારતના કૂટનીતિક નેતૃત્વ
હેઠળ દિલ્હી ઘોષણાપત્ર ઉપર પોતાની સહમતિ પણ વ્યક્ત કરી છે. સરળ શબ્દોમાં કહીએ તો, આ સમિટ ભારતને ટેક્નોલોજીની દુનિયામાં નવા વૈશ્વિક
નેતા તરીકે સ્થાપિત કરી રહી છે. આ શિખર સંમેલનનો સૌથી મહત્વનો કૂટનીતિક હિસ્સો દિલ્હી
ઘોષણાપત્ર રહ્યો. આઈટી મંત્રી અશ્વિની વૈષ્ણવે માહિતી આપી કે, અત્યાર સુધી 70 દેશોએ આ ઘોષણાપત્ર
પર હસ્તાક્ષર કરી દીધા છે અને અન્ય ઘણા દેશો સાથે ચર્ચા ચાલુ છે. તેમણે આશા વ્યક્ત
કરી હતી કે શનિવારે આ આયોજનના સમાપન સુધીમાં સહમતિ આપનાર દેશોની અંતિમ સંખ્યા 80ને પાર કરશે. દિલ્હી ઘોષણાપત્રની વિગતવાર
રૂપરેખા અને તેના મુખ્ય મુદ્દાઓ શનિવારે સંપૂર્ણ પારદર્શિતાથી વિશ્વ સમક્ષ રજૂ કરવામાં
આવશે. ભારતની વધતી ટેક્નોલોજીકલ શક્તિને ઘરેલુ સ્તરે પણ જબરદસ્ત પ્રતિસાદ મળ્યો છે.
આઈટી મંત્રીએ જણાવ્યું કે આ પ્રદર્શનમાં પાંચ લાખથી વધુ મુલાકાતીઓએ ભાગ લીધો, જે દેશની અદ્યતન ટેક્નોલોજી પ્રત્યેનો ભારે
ઉત્સાહ દર્શાવે છે. તે ઉપરાંત, આ આયોજન દરમિયાન ઇન્ફ્રાસ્ટ્રક્ચર
સંબંધિત 250 અબજ ડોલરથી
વધુના રોકાણના પ્રતિબદ્ધતા પત્રો પ્રાપ્ત થયા છે. આ વિશાળ રોકાણ ભારતીય અર્થવ્યવસ્થા
અને ઇન્ફ્રાસ્ટ્રક્ચર ક્ષેત્ર માટે મોટો ગેમ-ચેન્જર સાબિત થશે. આ મોટા ટેક્નોલોજી કાર્યક્રમ વચ્ચે કેટલીક રાજકીય
હલચલ પણ જોવા મળી. કોંગ્રેસ પાર્ટી દ્વારા આ મહત્વપૂર્ણ સંમેલનને વિક્ષેપિત કરવાનો
પ્રયાસ અંગે ટિપ્પણી કરતાં આઈટી મંત્રીએ સ્પષ્ટ કર્યું કે વિરોધ પક્ષના આ નાના પ્રયાસને
ભારતના યુવાનોએ મજબૂતીથી અને સંપૂર્ણ રીતે નકારી દીધો છે. આ સમિટે સાબિત કર્યું છે
કે ભારત હવે વૈશ્વિક ટેક્નોલોજી ક્રાંતિનું નેતૃત્વ કરવા માટે તૈયાર છે. 5 લાખથી વધુ મુલાકાતીઓની હાજરી અને 250 અબજ ડોલરનું વિશાળ રોકાણ સ્પષ્ટ
સંકેત આપે છે કે દેશની અર્થવ્યવસ્થા યોગ્ય દિશામાં આગળ વધી રહી છે.
