ભુજ, તા. 22 : શહેરની પાલારા જેલ ખાતેથી ચેકિંગ દરમિયાન બે મોબાઈલ મળી આવતાં અનેક તર્ક-વિતર્ક સર્જાવા સાથે શહેરના બી-ડિવિઝન પોલીસ મથકમાં ફરિયાદ દાખલ કરાવાઈ હતી. જેલના સુપરિન્ટેન્ડેન્ટ એન.એસ. લુહારે જણાવ્યું હતું કે, હાથ ધરાયેલી તપાસમાં જેલના સર્કલ નં.2, યાર્ડ નં.11માં બેરેક નં. 9 બાજુ આવેલા બાથરૂમ અંદર આવેલી ગટરમાં ત્રણ ફૂટ ઊંડા ખાડામાં છુપાવીને રખાયેલા સેમસંગ કંપનીનો 1 તથા નોકિયા કંપનનીનો 1 એમ 2 મોબાઈલ મળી આવ્યા હતા. આ બાબતે પોલીસ ફરિયાદ દાખલ કરાઈ છે તેમ શ્રી લુહારે જણાવ્યું હતું. અત્રે ઉલ્લેખનીય છે કે, ખાસનો દરજ્જો ધરાવતી પાલારા જેલમાંથી અનેક વખત મોબાઈલ મળી આવ્યા છે. આવા જ એક કેસમાં જિલ્લાના પૂર્વ સમાહર્તા પ્રદીપ શર્માને એક માસની જેલની સજા પણ થઈ ચૂકી છે.
