આજે વૈભવ ઇન્ટરનેશનલ ક્રિકેટમાં પદાર્પણ કરશે ?

બેલફાસ્ટ, તા. 25 : ટી-20 વિશ્વ કપ-2026ના સફળ અભિયાન બાદ ટીમ ઇન્ડિયા હવે આયરલેન્ડ વિરુદ્ધ બે મેચની શ્રેણી રમવા શુક્રવારથી મેદાનમાં ઉતરશે. આ શ્રેણી સાથે શ્રેયસ અય્યરના નેતૃત્વમાં ભારતીય ટીમ નવા પ્રકરણની શરૂઆત કરશે. જો કે કપ્તાની કરતા વધુ ચર્ચા 15 વર્ષીય વન્ડર બોય વૈભવ સૂર્યવંશીના ઇન્ટરનેશનલ ડેબ્યૂની છે. તેને ભારતીય ઇલેવનમાં જગ્યા મળવાની પ્રબળ સંભાવના છે. આ સાથે જ વૈભવ નવો રેકોર્ડ બનાવી શકે છે. તે ભારત તરફથી સૌથી નાની ઉંમરે ઇન્ટરનેશનલ મેચ રમશે અને મહાન સચિન તેંડુલકરનો રેકોર્ડ તોડી શકે છે. આયરલેન્ડ સામેની બીજી મેચ રવિવારે રમાશે. બન્ને મેચના સમયમાં ફેરફાર થયા છે અને હવે ભારતીય સમય અનુસાર સાંજે 6 વાગ્યાથી શરૂ થશે. મેચનું જીવંત પ્રસારણ સોની સ્પોર્ટસ નેટવર્ક અને સોની લિવ એપ પરથી થશે. વૈભવને ઈલેવનમાં સામેલ કરવો ટીમ મેનેજમેન્ટ માટે આસાન ફેંસલો નહીં હોય, કારણ કે પહેલેથી જ ભારતીય ટીમ પાસે અભિષેક શર્મા અને સંજૂ સેમસનના રૂપમાં સફળ ઓપનિંગ જોડી છે. વૈભવનો સમાવેશ કરવા માટે બેટિંગ ઓર્ડરમાં ફેરફાર કરવો પડશે. ટીમમાં ઇશાન કિશન પણ હાજર છે. ચાર નંબર પર નવો કપ્તાન શ્રેયસ અય્યર નક્કી મનાય છે. એવામાં અભિષેક, સેમસન અને ઇશાનમાંથી કોઇ એકની બાદબાકી થાય તો જ વૈભવની ઈલેવનમાં જગ્યા બની શકે છે. આ સ્થિતિમાં કદાચ પહેલી મેચમાં ઇશાનને વિશ્રામ મળી શકે છે જ્યારે સેમસન વનડાઉનમાં આવી શકે છે. નવો ઉપકપ્તાન તિલક વર્મા પાંચ નંબર પર હશે.  ઓલરાઉન્ડરની ભૂમિકા માટે ચાર ખેલાડી રેસમાં છે. જેમાં અક્ષર પટેલ, શિવમ દૂબે, વોશિંગ્ટન સુંદર અને નવોદિત સૂર્યાંશ શેડગે છે. આ ચારમાં કોઇ બે ખેલાડીને તક મળી શકે છે. ઝડપી બોલર હર્ષિત રાણા લાંબા સમય પછી વાપસી કરી શકે છે. પ્રિંસ યાદવ તેના આઇપીએલના શાનદાર દેખાવને લીધે પદાર્પણનો હકદાર છે. આયરલેન્ડ ટીમની કપ્તાની વિકેટકીપર લોર્કન ટકર સંભાળવાનો છે. આયરલેન્ડની નજર વર્લ્ડ ચેમ્પિયન ટીમ ઈન્ડિયાને આંચકો આપવા પર રહેશે.