લંડન, તા. 9 : ભારત અને ગુરુવારથી લોર્ડસના ઐતિહાસિક મેદાન પર ત્રીજી ટેસ્ટમાં
આમને-સામને હશે. ત્યારે બનેનું લક્ષ્ય જીવંત પીચ પર જીત મેળવીને શ્રેણીમાં સરસાઇનુ
રહેશે. ટેસ્ટની આંચકારૂપ હાર બાદ ટીમ ઇન્ડિયાએ બીજી ટેસ્ટમાં શાનદાર વાપસી કરીને વિદેશી
ધરતી પર 336 રનના અંતરથી સૌથી મોટી જીત
મેળવી હતી. આથી યુવા કપ્તાન શુભમન ગિલની ટીમ આત્મવિશ્વાસથી ઓતપ્રોત છે. બીજી તરફ એજબેસ્ટન
ટેસ્ટની હારથી બેન સ્ટોકસની ટીમ હતપ્રભ છે. તેનો ઇરાદો લોર્ડસ ટેસ્ટની ઝડપી અને ઉછાળ
ધરાવતી પિચ પર ભારતીય ટીમ સામે વળતો પ્રહાર કરવાનો છે, પણ તેમની રાહ કઠિન છે કારણ કે ટીમ ઇન્ડિયાના
બેટરો અને બોલરો શાનદાર ફોર્મમાં છે અને લોર્ડસમાં બુમરાહ વાપસી કરી રહ્યો છે. લોર્ડસ
ટેસ્ટ દરમિયાન વરસાદના વિઘ્નની સંભાવના છે.
મેચ ભારતીય સમય અનુસાર ગુરુવારે બપોરે 3-30થી શરૂ થશે. ઇંગ્લેન્ડ ટીમ
હવે રણનીતિ બદલી રહી છે અને ઘરેલુ પરિસ્થિતિ અને ઉછાળવાળી પીચ પર ભારતીય ટીમને ઘેરવા
કમરકસી રહી છે. પોતાના ઝડપી બોલિંગ આક્રમણમાં પણ ફેરફાર કર્યો છે. જોશ ટંગના સ્થાને
જોફ્રા આર્ચરનો સમાવેશ કરીને ઝડપી બોલિંગ વધુ મજબૂત કરવાની કોશિશ કરી છે. જો કે, આ મામલે ભારતનો હાથ ઉપર રહેશે. કારણ કે ભારતીય
ઇલેવનમાં બુમરાહની વાપસી થશે. આથી લોર્ડસની જીવંત પીચ પર બુમરાહના સાથેમાં સિરાજ અને
આકાશનો સામનો કરવો ઇંગ્લીશ બેટધરો માટે અગ્નિપરીક્ષા બની રહેશે. બુમરાહની અનુપસ્થિતિમાં
આકાશ-સિરાજે મળી બીજી ટેસ્ટમાં 17 વિકેટ ઝડપીને ભારતને જીત અપાવી હતી. મંગળવારે ટીમ ઇન્ડિયાના
વૈકલ્પિક અભ્યાસ સત્રમાં હતો. બુમરાહે એક કલાક સુધી બોલિંગ પ્રેક્ટિસ કરી હતી. જે દરમિયાન
તેની ઝડપી અને ધાર જબરદસ્ત રહી હતી. ભારતીય ઇલેવમાં સ્પિનર વોશિંગ્ટન સુંદરના સ્થાને
બુમરાહનો લગભગ સમાવેશ થશે. આથી ભારતીય ઇલેવનમાં ચાર ઝડપી બોલર હશે. જેનો સામનો કરવો
લોર્ડસની ઉછાળવાળી વિકેટ પર ઇંગ્લેન્ડ માટે કઠિન બની રહેશે. ત્રીજી ટેસ્ટમાં ભારતીય કપ્તાન શુભમન ગિલની બેટિંગ
પર સહુની નજર રહેશે. તે શ્રેણીમાં 3 સદીથી પ00 ઉપર રન કરી
ચૂક્યો છે. તેની પાસે એકથી વધુ વિક્રમ ધ્વંશ કરવાની તક છે. ભારતની ચિંતા વાપસી કરનાર
કરુણ નાયરનું નબળુ ફોર્મ છે. આમ છતાં લોર્ડસમાં પણ તે ત્રીજા નંબર પર બેટિંગ કરતો જોવા
મળી શકે છે. બીજી તરફ ઇંગ્લેન્ડને તેના સૌથી
અનુભવી બેટર જો રૂટ પાસેથી મોટી ઇનિંગ્સની અને ઓપનર જેક ક્રાઉલી જવાબદારીથી બેટિંગ
કરે તેવી આશા રહેશે. કપ્તાન સ્ટોકસ માટે પણ બેટથી કમાલ કરવાનો સમય આવી ગયો છે. ભારતીય
બોલરો સામે હેરી બ્રુક અને જેમી સ્મિથ પર બ્રેક મુકવાનો પડકાર બની રહેશે.
