કચ્છી બહેનોની કળાના રંગે મોમ્બાસા રંગાયું

કેરા (તા. ભુજ), તા. 30 : કેન્યાના બંદરીય શહેર મોમ્બાસા ખાતે મહિલા મંડળ દ્વારા દિવાળીના તહેવાર નિમિત્તે `દરિયાની અંદર' વિષય ઉપર કચ્છી મહિલાઓએ દોરેલી બેનમૂન રેતરંગોળીએ ભારે આકર્ષણ જમાવ્યું હતું. મોમ્બાસાથી કચ્છી અગ્રણી ભાનુબેન અરવિંદ ભુડિયાએ  કચ્છમિત્રને વિગતો આપતાં જણાવ્યું કે, છેલ્લા બે વર્ષથી ભારતીય સંસ્કૃતિની અભિવ્યક્તિ રૂપે અહીંની મહિલાઓ રંગોળી સ્પર્ધા યોજી રહી છે. ચાલુ વર્ષે 163 જેટલી બહેનોએ  હસ્તકૌશલ્યની લહાણી કરી હતી, જેમાં નવ પુરુષે પણ ભાગ લીધો હતો. આ રંગોળીઓમાં રેતરંગ ઉપરાંત દરિયાઈ કોડી, છીપલાં, મોતી અને પેન્સિલ રંગનો ઉપયોગ કરાયો હતો. દરિયાના જીવો, વનસ્પતિના આકારોમાં સૂર્યના પ્રકાશ કિરણોને તાદૃશ કરાયા હતા. આખીયે સ્પર્ધામાં દરિયાનાં વાતાવરણને શુદ્ધતા - રક્ષણનો સંદેશો હોવાનું મૂળ માંડવીના ભારતીબેન હીરાણીએ ઉમેર્યું હતું  ભાગ લેનાર દરેકને પ્રોત્સાહન ઈનામો અપાયાં  હતાં. આ મહિલા મંડળ સાંસ્કૃતિક કાર્યક્રમો ઉપરાંત કળાની અભિવ્યક્તિરૂપ આયોજનો વર્ષોથી કરી રહ્યાં છે. હિન્દુસ્તાનથી દૂર રહીને પણ વતનની સોડમ સર્જતા મોમ્બાસા મહિલા મંડળના સભ્યોને  હસુભાઈના મોટીમા રતનબેન ભુડિયાના હસ્તે ઈનામો અપાયાં હતાં. મત્સ્ય અવતારની અદ્ભુત કૃતિએ વાહવાહી મેળવી હતી, તો દરિયાઈ ખજાનાની કલ્પના આબેહૂબ સર્જાઈ હતી. બહોળી સંખ્યામાં સ્થાનિક મહિલાઓએ પ્રદર્શન નિહાળ્યું હતું. મહિલાઓનાં ટેરવાંની કમાલ જેવી કૃતિઓ આખાય મોમ્બાસામાં આકર્ષણનું કેન્દ્ર બની હતી.