આદિપુરમાં સોનાનો હાર લઈ પરત ન આપતાં ફરિયાદ

ગાંધીધામ, તા. 4 : આદિપુરમાં શખ્સે સોનાનો હાર લઈ બાદમાં તેને ફાયનાન્સમાં મૂકી લોન મેળવી સોનાનો હાર પરત ન કરતાં બે શખ્સ સામે ગુનો નોંધાયો હતો. આદિપુરમાં રહેનાર એક મહિલાએ અમિત કાનજી માતંગને સોનાનો હાર આપ્યો હતો. બાદમાં આ શખ્સે હારને સોનીને ત્યાં ગીરો મૂકી પૈસા મેળવી લીધા હતા. જે અંગે તેને કહેવાતાં તેણે સોની પાસેથી હાર પરત લઈને આપી દેશે તેવું કહ્યું હતું. બાદમાં આ શખ્સના ભાઈ દીપક કાનજી માતંગે આ હાર ફાયનાન્સ પેઢીમાં આપી રૂપિયા મેળવી લીધા હતા. હાર પરત માગવા છતાં તે પરત ન આપતાં આ બન્ને ભાઈઓ સામે આદિપુર પોલીસ મથકે ફરિયાદ નોંધાઈ હતી. જેની આગળની વધુ તપાસ પોલીસે હાથ ધરી છે.