અમદાવાદ, તા. 22 (અમારા પ્રતિનિધિ તરફથી) : અમદાવાદ
શહેરમાં ફરી એકવાર રક્ષક જ ભક્ષક બન્યા હોવાની શરમજનક ઘટના સામે આવી છે. હાલ ગાંધીનગર
ખાતે ફરજ બજાવતા પોલીસ ઇન્સ્પેક્ટર (પીઆઇ) બરકત અલી ચાવડા સામે વેજલપુર પોલીસ સ્ટેશનમાં
છેડતીની ગંભીર ફરિયાદ નોંધાઈ છે. કચ્છમાં પણ તેણે જે-તે સમયે દુષ્કર્મના બનાવમાં ચર્ચાસ્પદ
રહ્યા હતા. હાલમાં એક 19 વર્ષીય યુવતીએ
પીઆઇ પર લિફ્ટમાં શારીરિક અડપલાં કર્યાનો આરોપ લગાવતા પોલીસબેડામાં ખળભળાટ મચી ગયો
છે. આ બનાવ અંગે મળતી માહિતી મુજબ આ ઘટના એક બિલ્ડિંગની લિફ્ટમાં બની હતી. ભોગ બનનાર
19 વર્ષીય યુવતીનો આરોપ છે કે, લિફ્ટ બંધ થતાં જ પીઆઇ બરકત અલી ચાવડાએ તેની
એકલતાનો લાભ ઉઠાવ્યો હતો. પીઆઇએ યુવતીના ખભા પર હાથ મૂકીને તેની સાથે શારીરિક અડપલાં
કર્યાં હતાં. આ દરમિયાન લિફ્ટ છઠ્ઠા માળે પહોંચી હતી, જ્યાં બીજા
લોકો લિફ્ટમાં આવતાં જ પીઆઇ બરકત ચાવડા ત્યાંથી નીકળી ગયા હતા. અચાનક બનેલી આ ઘટનાથી
યુવતી ખૂબ જ ગભરાઈ ગઈ હતી. જો કે, હિંમત દાખવીને તેણે તાત્કાલિક
181 `અભયમ' હેલ્પલાઇન પર ફોન કરીને મદદ માંગી હતી. નોંધનીય
છે કે, પીઆઈ ચાવડા અગાઉ પણ આ પ્રકારના વિવાદમાં આવી ચૂક્યા છે.
પ્રાપ્ત માહિતી અનુસાર, અગાઉ કચ્છમાં દુષ્કર્મની ફરિયાદ થઈ હતી,
જ્યારે તેઓ પીએસઆઇ હતા, પરંતુ એમાં કોર્ટમાં નિર્દોષ
છુટકારો થયો હતો. આ ઘટનાની ગંભીરતાને ધ્યાને લઈ વેજલપુર પોલીસે યુવતીની ફરિયાદના આધારે
પીઆઈ બરકત અલી ચાવડા સામે ગુનો નોંધીને કાયદેસરની કાર્યવાહી હાથ ધરી છે. ઉચ્ચ પોલીસ
અધિકારીઓ દ્વારા આ મામલે તટસ્થ તપાસ શરૂ કરવામાં આવી છે.
