દિવ્યેશ વૈદ્ય દ્વારા : મુંદરા , તા. 29 : હાલમાં સાયબર ઠગ ટોળકીનો આતંક વધી ગયો છે અને વારંવાર ઘટના છતાં
ભણેલા-ગણેલા અને તબીબ કક્ષા સહિત અનેક શિક્ષિત લોકો પણ ફસાઈ રહ્યા છે. લોકોમાં થોડી જાગૃતિ પછી સાયબર ઠગો દ્વારા હવે ઓટીપી
કે લિંક મોકલવાની `મોડસ ઓપરેન્ડી'ને બદલે
પોલીસ, ન્યાયાધિશ, ઇન્કમટેક્સ જેવા
સરકારી તંત્રના અધિકારીઓના ખોટાં નામે `ડિજિટલ એરેસ્ટ' એટલે કે ગંભીર કાર્યવાહીની ધમકીઓ
આપીને છેતરપિંડી થઈ રહી છે. આ મહિનાની શરૂઆતમાં કચ્છના મુંદરા તાલુકાના ભુજપુરમાં તબીબ
દંપતી છતરાપિંડીનો ભોગ બન્યાનો દાખલો બહાર આવ્યા બાદ એ જ પ્રકારની અનેક ઠગાઈની ફરિયાદો
બહાર આવી છે. આ નવી ધમકીભરી યુક્તિઓ સામે લોકોએ ચેતવી જવાની જરૂર છે. હાલમાં અલગ અલગ
જગ્યાએથી બહાર આવેલા કિસ્સાઓમાં એકજ પ્રકારની
મોડસ ઓપરેન્ડી દેખાઈ આવી છે, જેમાં રૂપિયા કપાયા એ ખાતાની બેંક
પણ દરેકમાં એક જ છે અને વીડિયો કોલ તેમજ ધમકીનો પ્રકાર એક સરખો દેખાયો છે. આ બાબતે ભોગ બનેલા લોકો અને તપાસકર્તાઓએ અન્ય લોકોની
જાગૃતિ માટે કચ્છમિત્રને જણાવ્યું હતું કે, ભુજપુરની ઘટનામાં
કેનેરા બેન્કનો એકાઉન્ટ નંબર ભોગ બન્યો હતો, જ્યારે પછીથી બનેલા
કેટલાક કિસ્સાઓમાં પણ કેનેરા બેન્કમાંથી જ રકમ નીકળી ગઈ હતી. ભુજપુરના કિસ્સામાં વીડિયો
કોલથી નકલી પોલીસ સ્ટેશન બતાવ્યા બાદ ધમકી આપીને લૂંટ કરાઈ. જ્યારે એ પછી અઠવાડિયામાં
જ વિલેપાર્લા મુંબઈની નોંધાયેલી ઘટનામાં 73 વર્ષીય ડોક્ટર પણ એજ રીતે ડિજિટલ એરેસ્ટનો ભોગ બન્યા હતા. આ
કેસમાં એવી મોડસ ઓપરેન્ડી હતી કે, વીડિયોકોલ
દ્વારા પોલીસ અને જજ સાથે વાત કરાવવામાં આવી. જો કે, તેમાં પોલીસે
1.29 કરોડ બચાવી આપ્યા હતા. આ કિસ્સામાં
એરવેઝ કંપનીના સ્થાપક નરેશ ગોયલ સામે જે કેસ ચાલી રહ્યો છે, તેમાં કડી હોવાનું કહીને મની લોન્ડરિંગના કેસમાં
ફસાવી કાર્યવાહીની ધમકી આપીને સાયબર ઠગ ટોળકીએ
2.89 કરોડ પડાવ્યા હતા. આ પછીના
એક કિસ્સામાં સુરતમાં એક વૃદ્ધનાં ખાતામાંથી 16 લાખ ઉપડી ગયા હતા, જેમાં ભાવનગરના આંતરરાષ્ટ્રીય બાસ્કેટબોલ ખેલાડી સહિતના ત્રણ ઝડપાઈ ચૂક્યા
છે. આ કેસમાં ઠગોએ દિલ્હી પોલીસની ખોટી ઓળખ
આપી હતી અને એમાં પણ મની લોન્ડરિંગ કેસની જ
ધમકી આપવામાં આવી હતી. આ સાથે સ્કાઇપ દ્વારા વીડિયોકોલનો પણ ઉપયોગ થયો હતો અને કેનેરા
બેન્કનાં ખાતામાંથી જ રૂપિયા ઉપડી ગયા હતા. આવી ઘટનાઓ બાદ પ્રશ્ન એ ઊભો થાય છે કે,
કયાં ખાતામાં મોટી રકમ છે એ આ ટોળકીને ખબર કેમ પડે છે અને બધામાં એક
જ પ્રકારની મોડસ ઓપરેન્ડી છે એટલે એક જ ટોળકી આમાં કામ કરે છે. સવાલ એ પણ છે કે,
વારંવાર ઘટના છતાં રોક કેમ નથી લાગી શકાતી આવી ઘટનાઓમાં ઝડપભેર વધારો
થઈ રહ્યો છે ત્યારે ડિજિટલ એરેસ્ટ જેવા કોઈ પ્રયાસ થાય, તો સંબંધિત
સરકારી તંત્રનો સંપર્ક કરવા આ જાણકારોએ સૂચન કર્યું હતું.
