રાજકોટ, તા. 13 : વડોદરા વન-ડેમાં વિરાટ કોહલીના
ઝમકદાર 93 રનની મદદથી જીત મેળવ્યા બાદ
ટીમ ઇન્ડિયા આવતીકાલે અહીંના નિરંજન શાહ સ્ટેડિયમમાં રમાનારી બીજી વન-ડે જીતીને શ્રેણી
કબજે કરવાના ઇરાદે ઊતરશે. ખેલાડીઓની ઇજાની વધતી સમસ્યા છતાં ભારત ફેવરિટ તરીકે ઊતરશે, તો ન્યુઝીલેન્ડ વળતો વાર કરવા મથશે. વડોદરામાં
રમાયેલી પહેલી મેચમાં ભારતે ન્યુઝીલેન્ડને ચાર વિકેટથી હરાવીને વિજયી શરૂઆત કરી હતી,
પરંતુ સાઇડ સ્ટ્રેઇનના કારણે બાકીની શ્રેણી માટે વોશિંગ્ટન સુંદર બહાર
થઇ ગયો છે. પસંદગીકારોએ દિલ્હીના આયુષ બદોનીને
ટીમમાં સામેલ કર્યા છે, પરંતુ મુખ્ય કોચ ગૌતમ ગંભીરની પસંદગીને
ધ્યાનમાં રાખીને ભારત ટીમમાં નીતીશકુમાર રેડ્ડીના રૂપમાં બીજા ઓલરાઉન્ડરને ટીમમાં સામેલ
કરે તેવી શક્યતા છે. રાજકોટની પીચ બેટધરોને મદદ કરે તેવી શક્યતા છે. ટીમ ઇન્ડિયાની
મેચ હોવાથી શહેરમાં ક્રિકેટ ફીવર ફેલાઇ ગયો છે. શહેરીજનોને વિરાટ અને રોહિત શર્માની
શાનદાર બેટિંગની આશા છે. પહેલી વન-ડેની પૂર્વસંધ્યાએ, ભારતીય
થ્રો-ડાઉન સ્ટાફ સામે બેટિંગ કરતી વખતે રિષભ પંતને ફટકો પડયો હતો અને તે શ્રેણીમાંથી
બહાર થઇ ગયો હતો. તેમની હકાલપટ્ટીને કારણે પસંદગીકારોએ ધ્રુવ જુરેલને ટીમમાં સામેલ
કરવાનો નિર્ણય લીધો હતો. ઉપલબ્ધ વિકલ્પો હોવા છતાં, ભારતની સફેદ
બોલ ટીમ ટી-20 વર્લ્ડ કપને
એક મહિનાથી પણ ઓછો સમય બાકી હોવાથી વધુ ઇજાઓ જોવા માગશે નહીં. કોહલી પહેલી વન-ડેમાં
પોતાની 54મી વન-ડે સદી ચૂકી ગયો, પરંતુ તેના ઝમકદાર 91 બોલમાં 93 રનની મદદથી ભારતની જીત નક્કી
થઇ હતી. કેપ્ટન શુભમન ગિલે અડધી સદી ફટકારી હતી અને તેનો ડેપ્યુટી શ્રેયસ ઐયર એક રનથી
પોતાની સદી ચૂકી ગયો હતો. ભારતે હજુ પણ તેના બોલિંગ પ્રદર્શનમાં નોંધપાત્ર સુધારો કરવો
પડશે. વડોદરામાં સ્પિનરો બહુ અસરકારક સાબિત થયા નહોતા. એ જ રીતે પ્રસિદ્ધ ક્રિષ્નાની
પણ ધોલાઇ થઇ હતી.
