નલિયા એસ.ટી. સ્ટેશને બાંકડાના અભાવે મુસાફરો જમીન પર બેસવા મજબૂર

નલિયા, તા. 7 : અબડાસા તા.ના 164 ગામના કેન્દ્ર સમાન નલિયા એસ.ટી. બસ સ્ટેશનમાં સુવિધાઓના અભાવે મુસાફરો હાલાકી ભોગવી રહ્યા છે. તાલુકામથક હોવાથી અહીં મુસાફરોનો સતત ધસારો રહે છે, પરંતુ બેસવા માટે પૂરતા બાંકડા ન હોવાથી વૃદ્ધો, મહિલાઓ અને બાળકોને જમીન પર બેસવાની નોબત આવી છે. કલાકો સુધી બસની રાહ જોતા મુસાફરોને પૂરતી બેઠક વ્યવસ્થા ન મળતાં રોષની લાગણી ફેલાઇ છે. એસ.ટી. વિભાગ દ્વારા મુસાફરોની આ હાલાકી દૂર કરવા માટે તાત્કાલિક ધોરણે નવા અને વધારાના બાંકડાઓ મૂકવામાં આવે તેવી પ્રબળ માંગ ઊઠી છે.