સરહદી વિસ્તાર એમ્બ્યુલન્સના સાયરનથી ગાજી ઊઠયો

મુસા સુમરા દ્વારા : સુમરાપોર પચ્છમ, તા. 9 : સરહદી પચ્છમ વિસ્તારના કોટડા ચેકપોસ્ટથી આગળ ગોઝારા અકસ્માતથી વહેલી પરોઢે સરહદી વિસ્તાર મરણચીસોથી ગાજી ઊઠયો હતો. આ ગમખ્વાર અકસ્માતની જાણ થતાં પોલીસ ત્યાં દોડી આવી હતી અને ઘવાયેલાઓ માટે એમ્બ્યુલન્સને બોલાવાઇ હતી. 108ના સાયરનથી સરહદી વિસ્તાર ગુંજી ઊઠયો હતો. પોલીસ ખડેપગે રહી આ કામગીરીમાં જોતરાઇ હતી. પચ્છમ વિસ્તારમાં આવો મોટો અને ભયંકર અકસ્માત પ્રથમ વખત બનતાં પચ્છમવાસીઓએ મૃતકોને શ્રદ્ધાંજલિ આપી દુ:ખ વ્યક્ત કર્યું હતું. વહેલી પરોઢે ટ્રાફિકજામ થતાં પોલીસ માટે દોડધામ થઇ પડી હતી અને સરહદનો પ્રવેશ સવારના ભાગે બંધ કરાયો હતો. આ વેળાએ મોતનો મસાલો લઇને ફરતા વાહનો પર અંકુશ લાવવા આ પંથકમાં માંગ ઊઠી હતી.