મતદારોના નામ કાઢવા અંગે કાવતરાના આક્ષેપો

ભુજ, તા. 22 : રાજ્યમાં મતદાર યાદીની ખાસ સઘન સુધારણા-2026 સંદર્ભે છેલ્લી ઘડીએ ફોર્મ-7 વાંધાઓની તપાસની કચ્છ જિલ્લા કોંગ્રેસ સમિતિએ માંગ કરી હતી. મતદાર યાદીની ખાસ સઘન સુધારણા સંદર્ભે મુસદા મતદારયાદી પ્રસિદ્ધ થયા બાદ સદર મતદાર યાદી અનુસંધાને વાંધા, સૂચન અને હક્ક-દાવા માટે ફોર્મ નં. 6, 7, 8 ભરવાની છેલ્લી તારીખ 18/1 નિર્ધારિત કરાઈ હતી. પરંતુ તા. 16/1ના અચાનક સમગ્ર ગુજરાતમાં મતદાર નામ કમી કરવા માટેનું ફોર્મ નં. 7 હજારોની સંખ્યામાં આવતા ફોર્મ-7 વાંધાઓનું સંકલિત ફાઈલિંગ દ્વારા મતદારોના નામ કાઢી નાખવા તથા મતદાર યાદીમાં છેડછાડ કરવા માટેનું કાવતરું હોવાનો આક્ષેપ કરતા જિલ્લા કોંગ્રેસ સમિતિએ ગુજરાત રાજ્ય ચૂંટણી આયોગની નિષ્પક્ષતા સામે પ્રશ્નો કર્યા હતા. આ અંગે ફોર્મ નં. 7 સબમિટ કરવાના સમયગાળાના છેલ્લા દિવસો તા. 16,17,18 જાન્યુઆરી જેટલા ફોર્મ નં. 7 સ્વીકારવામાં આવ્યા હોય તે બધી જ ઓફિસોના સીસીટીવી ફૂટેજ આપવા, તપાસવા તથા જથ્થાબંધ ફોર્મ નં. 7 સ્વીકાર્યા હોય તેવા ઓફિસના અધિકારીઓની ભૂમિકાને તપાસવા તથા કાયદાકીય પ્રક્રિયાને ઉલ્લંઘન કરતા જણાય તો ફોજદારી પગલાં લેવાની માંગ કરી હતી. તથા રાજ્યમાં છેલ્લા દિવસોમાં જુદી-જુદી ઓફિસોમાં જમા કરાયેલા ફોર્મની પ્રાથમિક યોગ્યતા ચકાસી કોઈ યોગ્યતા પ્રાપ્ત મતદાર મતદાનના અધિકારથી  વંચિત ન રહે તે માટે ગેરકાયદેસરના વાંધાઓ ફગાવીને મતદારોને મતાધિકારનો ઉપયોગ કરવા દેવા કચ્છ જિલ્લા કોંગ્રેસ સમિતિ પ્રમુખ વી.કે. હુંબલે માંગ કરી હતી.