રાહુલને અનુરાગનો પડકાર : મતચોરીના પુરાવા આપો

નવી દિલ્હી, તા. 12 : ભાજપ નેતા અને કેન્દ્રીય મંત્રી અનુરાગ ઠાકુરે કોંગ્રેસ સાંસદ રાહુલ ગાંધી પર ચૂંટણીપંચ અને ન્યાય વ્યવસ્થા સામે પ્રશ્નો ઊભા કરીને દેશની સંસ્થાઓને નબળી પાડવાનો આરોપ મૂકયો હતો. રાહુલ ગાંધીએ ફક્ત આક્ષેપ કરવાના બદલે પોતે કરેલા દાવાના સમર્થનમાં પુરાવા રજૂ કરે તેવો પડકાર ઠાકુરે ફેંકયો હતો. રાહુલનાં નિવેદનો પર પ્રતિક્રિયા આપતાં અનુરાગે કહ્યું હતું કે, સુપ્રીમ કોર્ટને રાજકીય વિવાદોનો મંચ બનાવવી જોઈએ નહીં. તેમણે આરોપ મૂકયો હતો કે રાહુલ ગાંધી સતત ચૂંટણીપંચ પર પ્રશ્નો ઊભા કરે છે, પરંતુ તેમણે લગાવેલા આરોપોના સમર્થનમાં કોઈ પુરાવા રજૂ કરતા નથી. તેમણે કહ્યું કે, રાહુલે બંધારણીય સંસ્થાઓ અને કાયદાનું સન્માન કરવું જોઈએ. વધુમાં આરોપ લગાવતા કહ્યું કે, કોંગ્રેસ પોતાને નિયમોથી ઉપર માનીને વર્તે છે. ઠાકુરે કહ્યું હતું કે, ચૂંટણી પ્રક્રિયા પર કોંગ્રેસે પહેલાં પણ પ્રશ્નો ઊભા કર્યા હતા અને હવે બેલેટ પેપરથી ચૂંટણી કરવાની માગણી કરે છે. તેમણે કોંગ્રેસ પર બૂથ પર કબજો કરવાનો પણ આરોપ લગાવ્યો હતો. જો કે આ આરોપ તેમના રાજકીય નિવેદનોનો ભાગ છે તેને સ્વતંત્ર રીતે સાચા માનવા જોઈએ નહીં. અનુરાગે કહ્યું હતું કે, લોકતંત્રમાં પ્રશ્નો પૂછવા એ વિપક્ષનો અધિકાર છે, પરંતુ લગાવાયેલા આરોપોના પુરાવા આપવા પણ જરૂરી છે. તેમણે રાહુલ ગાંધીને રાજકીય આરોપોની રાજનીતિ બંધ કરી તથ્યોના આધારે પોતાની વાત રજૂ કરવાની અપીલ કરી છે.