ગાંધીધામ, તા. 12 : અહીંના ગળપાદર નજીક બ્રેકડાઉન
થયેલી ટ્રકને તપાસ કરવા ચાલક પ્રેમસિંહ ચમનસિંહ સોઢા (ઉ.વ. 43) નીચે ઊતરી તપાસ કરી રહ્યો હતો
ત્યારે પાછળથી ધડાકાભેર બીજી ટ્રક ભટકાતાં આ યુવાને પોતાનો જીવ ખોયો હતો. બીજીબાજુ વરસામેડી નજીક વેલસ્પન વિદ્યામંદિર
પાસે ટ્રક-ડમ્પરે બાઈકને હડફેટમાં લેતાં વિજય કાનજી મકવાણા (કોળી) નામના યુવાનનું મોત
થયું હતું. નખત્રાણાના બિબ્બર ચંદ્રનગરમાં રહેનાર પ્રેમસિંહ નામનો યુવાન ગત તા. 8/10ના ગાંધીધામ મુંદરા ધોરીમાર્ગ
બીએસએફ કેમ્પના ગેટ સામે ગળપાદર પાસે હતો. આ યુવાનની ટ્રક જી.જે. -32 - ટી - 6904 બ્રેકડાઉન થતાં તેણે પોતાનું
વાહન બાજુએ મૂક્યું હતું અને બાદમાં તે પોતાનું વાહન ચેક કરવા નીચે ઊતરી આગળ ગયો હતો.
દરમ્યાન પાછળથી ધસમસતી આવતી ટ્રક નંબર પી.બી.-30-એ-બી-7392 આવીને ઊભેલી
આ ટ્રકમાં ભટકાઈ હતી, જેથી ઊભેલી ટ્રક આગળ વધી હતી અને તપાસ કરતા પ્રેમસિંહના
પેટ પરથી પૈડું ફરી વળતાં તેને ગંભીર ઈજાઓ પહેંચી હતી. આ યુવાનને 108 મારફતે સારવાર અર્થે લઈ જવાતાં
ફરજ પરના તબીબે તેને મૃત જાહેર કર્યો હતો. આ અકસ્માતમાં પાછળના ટ્રકચાલકને પણ ઈજાઓ
પહોંચી હતી. બનાવ અંગે શંકરસિંહ ચમનસિંહ સોઢાએ પોલીસ મથકે ફરિયાદ નોંધાવી હતી. વધુ
એક જીવલેણ બનાવ વરસામેડી વેલસ્પન વિદ્યામંદિર આરટીઓ રોડ પર ગઈકાલે રાત્રે 9.30ના અરસામાં બન્યો હતો. અંજાર
ખાતે કરિયાણાની દુકાનમાં કામ કરનાર વિજય મકવાણા (કોળી) નામનો યુવાન રાત્રે દુકાનેથી
ઘર બાજુ બાઈક નંબર જેજે.-39-ઈ-0475 લઈને જઈ રહ્યો હતો. દરમ્યાન
ટ્રક ડમ્પર નંબર જીજે-12-બીઝેડ-7348એ આ બાઈકને હડફેટમાં લેતાં
ચાલક યુવાનને ગંભીર ઈજાઓ પહેંચી હતી. તેને સારવાર અર્થે લઈ જવાતાં ફરજ પરના તબીબે તેને
મૃત જાહેર કર્યો હતો. બનાવ અંગે યુવાનના પિતા કાનજી ચોડાભાઈ મકવાણા (કોળી)એ પોલીસ મથકે
ફરિયાદ નોંધાવી હતી.
