નવી દિલ્હી, તા. 13 : માઉન્ટ
મૌંગાનુઈ ખાતે ન્યૂઝીલેન્ડ સામેની ચોથી વનડેમાં ભારતીય બાટિંગ લાઈનઅપના ધબડકાએ ક્રિકેટ
ઈતિહાસની 43 વર્ષ
જૂની યાદો તાજી કરી દીધી છે. વર્ષ 1983ના વર્લ્ડ કપમાં ઝિમ્બાબ્વે સામે
9 રનમાં
4 વિકેટ
ગુમાવ્યા બાદ, શુક્રવારે ફરી એકવાર ભારતીય ટીમ આ જ શરમજનક
સ્કોર પર સમેટાયેલી જોવા મળી હતી. વનડે ક્રિકેટના ઈતિહાસમાં આ માત્ર બીજી વખત બન્યું
છે જ્યારે ભારતે પ્રથમ ચાર વિકેટ 10થી ઓછા રનમાં ગુમાવી હોય. ન્યૂઝીલેન્ડના
ઝડપી બોલર મેટ હેનરીએ ઇનિંગ્સના પ્રથમ બોલે જ રોહિત શર્માને સ્લિપમાં કેચ આઉટ કરાવી
ઝટકો આપ્યો હતો. ત્યારબાદ આ જ ઓવરમાં વિરાટ કોહલીને બોલ્ડ અને કેપ્ટન શ્રેયસ અય્યરને
એલબીડબલ્યુ આઉટ કરી ભારતનો સ્કોર ખાતું ખોલાવ્યા વિના 0/3 કરી
દીધો હતો. ઋતુરાજ ગાયકવાડ પણ માત્ર 5 રન બનાવી પેવેલિયન પરત ફરતા ભારતનો
સ્કોર 9/4 થઈ
ગયો હતો. આ દ્રશ્યે 1983ના વર્લ્ડ કપમાં ટનબ્રિજ વેલ્સ ખાતે ઝિમ્બાબ્વે
સામે રમાયેલી ઐતિહાસિક મેચની યાદ અપાવી હતી, જ્યાં 9/4 અને
ત્યારબાદ 17/5ની
કફોડી સ્થિતિમાંથી તત્કાલીન કેપ્ટન કપિલ દેવે અણનમ 175 રનની
યાદગાર ઇનિંગ રમી ટીમને ઉગારી હતી. જોકે, આ વખતે ભારત
માટે કોઈ તારણહાર બની શક્યું નહીં. વધુમાં, પ્રથમ 10 ઓવરમાં
ભારતનો 26/4નો
સ્કોર વર્ષ 2018 પછી
પાવરપ્લેમાં નોંધાયેલો સૌથી નીચો સ્કોર બની રહ્યો છે.
