મુંદરા તાલુકામાં બર્ન વોર્ડ યુનિટનો આરંભ

મુંદરા, 29 : મુંદરા તાલુકાની આરોગ્ય સેવાઓમાં એક મહત્ત્વપૂર્ણ સીમાચિહ્ન ઉમેરાયું છે. અદાણી હોસ્પિટલ્સ, મુંદરા ખાતે તાલુકાના પ્રથમ સમર્પિત અને અદ્યતન બર્ન વોર્ડ યુનિટનું ઉદ્ઘાટન કરવામાં આવ્યું છે. અદાણી ગ્રુપના એક્ઝિક્યુટિવ ડિરેક્ટર  રક્ષિત શાહના હસ્તે આ બર્ન વોર્ડ યુનિટનું ઉદ્ઘાટન કરવામાં આવ્યું હતું. આ પ્રસંગે અદાણી વિલ્મર લિ. ના વાઇસ પ્રેસિડેન્ટ  શરદ શર્મા અને હેલ્થકેર પ્રોજેક્ટ્સના એસોસિયેટ વાઇસ પ્રેસિડેન્ટ નેહા લાલ અતિથિ વિશેષ તરીકે ઉપસ્થિત રહ્યાં  હતા. મુંદરા તાલુકામાં પોતાની રીતે પ્રથમ એવી આ સમર્પિત બર્ન કેર સુવિધાનો ઉદ્દેશ દાઝી જવાના દર્દીઓને સમયસર, વ્યાપક અને વિશિષ્ટ સારવાર તેમના પોતાના વિસ્તારમાં ઉપલબ્ધ કરાવવાનો છે.  આ સુવિધાના પ્રારંભથી મુંદરા તથા આસપાસના વિસ્તારોના લોકોને વિશિષ્ટ બર્ન કેર માટે દૂરના શહેરો પરની નિર્ભરતા ઘટાડવામાં મદદ મળશે. ઇમરજન્સીની સ્થિતિમાં દર્દીઓને પોતાના વિસ્તારની નજીક જ જરૂરી સારવાર ઉપલબ્ધ થવાથી કિંમતી સમય બચાવવામાં મદદ મળશે. મુંદરા અને આસપાસના વિસ્તારના સતત વિકાસની સાથે સ્થાનિક સ્તરે ગુણવત્તાયુક્ત અને વિશિષ્ટ આરોગ્ય સેવાઓ ઉપલબ્ધ હોવી પણ એટલી જ મહત્ત્વપૂર્ણ બની રહી છે.  મુંદરા તાલુકાના પ્રથમ સમર્પિત બર્ન વોર્ડ યુનિટની શરૂઆત આ દિશામાં એક મહત્ત્વપૂર્ણ પગલું છે. અદાણી હોસ્પિટલ્સ વર્ષ 2018થી ગુણવત્તાયુક્ત, સુલભ અને દર્દી-કેન્દ્રિત આરોગ્ય સેવાઓ પૂરી પાડવાની દિશામાં કાર્યરત છે. અદ્યતન બર્ન કેર સુવિધાનો ઉમેરો આ પ્રતિબદ્ધતાને વધુ મજબૂત બનાવે છે.