માંડવી, તા. 28 : શેઠ
ગોકલદાસ ખીમજી અને શેઠ મથરાદાસ ખીમજી મસ્કતવાલા ચેરિટેબલ ટ્રસ્ટ પરિવાર દ્વારા બંદરીય
માંડવી શહેરમાં શેઠ ખીમજી રામદાસ કન્યા વિદ્યાલય, રામકૃષ્ણ
હાઇસ્કૂલ તથા સાકરબાઇ ખીમજી રામદાસ મેમોરિયલ ઇંગ્લિશ મીડિયમ સ્કૂલમાં કુલ 3500 વિદ્યાર્થીઓએઁ અભ્યાસ કરી પોતાની કારકિર્દીનું
ઘડતર કર્યું છે. ત્યારે રમત-ગમત, સંગીત વિગેરે ક્ષેત્રે રાષ્ટ્રીય તેમજ રાજ્ય
કક્ષાએ સિદ્ધિ બદલ ટ્રસ્ટ પરિવાર દ્વારા વિદ્યાર્થીઓને રોકડ પુરસ્કાર સાથે સન્માનનો
કાર્યક્રમ ગોકુલ રંગભવન ખાતે યોજાયો હતો, જેમાં 149 વિદ્યાર્થીઓ, 8 શિક્ષક તથા 5 આચાર્યનું
વિશિષ્ટ બહુમાન કરાયું હતું. પ્રારંભમાં મંચસ્થોના હસ્તે દીપ પ્રાગટ્યથી કાર્યક્રમ
શરૂ કરવામાં આવ્યો હતો. સ્વાગત પ્રવચનમાં ટ્રસ્ટના માનદ્ મંત્રી ભરતભાઇ વેદે કહ્યું
હતું કે, ટ્રસ્ટ દ્વારા દર વર્ષે વિદ્યાર્થીઓની સિદ્ધિઓને બિરદાવાય છે. ગત વર્ષે
ગોકુલ રંગભવનનું કામ ચાલુ હોતાં બે વર્ષમાં રાષ્ટ્રીય તથા રાજ્ય કક્ષાએ રમત-ગમત, સંગીત તેમજ વિવિધ ક્ષેત્રે મેળવેલ સિદ્ધિને બિરદાવવામાં આવી છે. વિદ્યાર્થીઓને
સાથે પરિવારને, શિક્ષકો અને આચાર્યોની પણ પીઠ થાબડી હતી.
ખીમજી રામદાસ માંડવી અને કચ્છમિત્ર એકબીજાના પર્યાય હોવાનું કહેતાં કચ્છમિત્રના તંત્રી
દીપકભાઇ માંકડએ ઉદ્બોધનમાં કહ્યું હતું કે,
78 વર્ષથી કચ્છના વિકાસનું કચ્છમિત્ર અભિન્ન
અંગ બની ગયું છે. અલગ-અલગ સેન્ટરમાં જઇ શિક્ષણ,
ઉદ્યોગો, રમત-ગમત
વિગેરે અનેક ક્ષેત્રે કચ્છમિત્ર દ્વારા ઘણા કાર્યક્રમો યોજાયા છે. શિક્ષણ ક્રાંતિ આવી
છે, વર્ષોથી કચ્છના લોકો માટે માંડવીમાં શેઠ ગોકલદાસ ખીમજી અને શેઠ મથરાદાસ
ખીમજી મસ્કતવાલા ચેરિટેબલ ટ્રસ્ટએ શિક્ષણ ક્ષેત્રે કચ્છને નવી દિશા આપી છે. ટ્રસ્ટની
ઉચ્ચ ભાવના- વિદ્યાર્થીઓના કારકિર્દી ઘડતરમાં શિક્ષકોનું મહત્ત્વનું પ્રદાન હોવાનું
જણાવી શુભેચ્છા સાથે વિદ્યાર્થીઓનો તરવરાટ જોઇ ખુશી વ્યકત કરી હતી. પોતાના બચપણના માંડવી
સાથેના શૈક્ષણિક સંભારણાં યાદ કરી વધુમાં કહ્યું હતું કે, રમત જીવનમાં ઘણું શીખવે છે. માઇક્રોસોફટના વડા સત્યા નાડેલા તેનું ઉત્તમ
ઉદાહરણ છે. મામલતદાર વિનોદભાઇ ગોકલાણીએ ખેલ
મહાકુંભ તેમજ રમત-ગમત ક્ષેત્રે અનેક સ્પર્ધાઓનાં આયોજનમાં ત્રણેય શાળાના વિદ્યાર્થીઓ
ઉત્સાહભેર ભાગ લે છે. તેમને તથા તેમના વાલીને અભિનંદન આપી ટ્રસ્ટ દ્વારા વિદ્યાર્થીઓનાં
જીવનનું ઘડતરમાં કાર્ય થયું છે તે બદલ ટ્રસ્ટની ભાવનાને બિરદાવી હતી. પ્રાથમિક વિભાગના
મિમિક્ષાબેન વી. ગોસ્વામી, માધ્યમિક વિભાગના પારૂલબેન ચૌહાણ, સંગીત શિક્ષક સુલતાનભાઇ મીર,
નીકિતાબેન કે. રાઠોડ, આર્ચીબેન ખત્રી, રામદેવસિંહ ઝાલા તેમજ રામકૃષ્ણ હાઇસ્કૂલના
ધર્મેશભાઇ ડી. આચાર્ય, મોહનભાઇ કે. મહેશ્વરી, ત્રણેય શાળાના આચાર્ય જાગૃતિબેન ડી. સોલંકી, હંસાબેન એમ. પંડયા, હીનાબેન એસ. શાહ, ઇશ્વરભાઇ ડી. ચારણનું વિશિષ્ટ સન્માન કરાયું હતું. ટ્રસ્ટી દીપકભાઇ સોની, સી.વાય. બારોટ, મહેશભાઇ સંપટ, વાડીલાલભાઇ દોશી, હીનાબેન શાહ, લીનેશભાઇ શાહ, પ્રિયંકાબેન સોની, ગૌરવભાઇ બી. શાહ, હંસાબેન પંડયા, મેહુલભાઇ શાહ, જાગૃતિબેન સોલંકી ઉપસ્થિત રહ્યા હતા. માંડવી
શહેર ભાજપ પ્રમુખ દેવાંગભાઇ દવેની સેવાની વિશેષ નોંધ લેવાઇ હતી.
