નવી દિલ્હી, તા. 24 : દિલ્હી ખાતેના અરુણ જેટલી સ્ટેડિયમમાં રમાયેલી આઈપીએલની ગુજરાત ટાઈટન્સ અને દિલ્હી કેપિટલ્સ વચ્ચેની મેચમાં ડીસીએ ખડકેલા 224 રનના ખડકલા સામે જીટીએ શરૂઆતથી જ મજબૂત રીતે બેટિંગ કરી હતી, પણ આગળ વધતા બીજા દાવમાં ગુજરાતની પકડ ઢીલી થઈ અને એક પછી એક વિકેટ પડતાં અંતે જીટીએ 20 ઓવરમાં 220 રન કરતાં દિલ્હીની 4 રને જીત થઈ હતી. જીતના ઈરાદે મેદાને ઊતરેલી ગુજરાતના રિદ્ધિમાન સહા અને સાઈ સુદર્શને બાજી સંભાળી હતી. જો કે, સહા 25 દડામાં 5 ચોગ્ગા અને 1 છગ્ગા સાથે 39 રન બનાવી પરત ફર્યો હતો, જ્યારે સુદર્શન પણ ગુજરાતની આશા કાયમ રાખવામાં નાકામ રહ્યો હતો અને 39 દડામાં 7 ચોગ્ગા અને 2 છગ્ગા સાથે 65 રને કેચ આઉટ થયો હતો અને શાનદાર બેટિંગનો અંત થયો હતો. જો કે, ત્યાર બાદ ડેવિડ મિલરે પણ 23 દડામાં 6 ચોગ્ગા અને 3 છગ્ગા સાથે 55 રન કર્યા હતા. રસિખ સલામે 4 ઓવરમાં 44 રન આપી 3 વિકેટ ખેરવી હતી, જ્યારે કુલદીપ યાદવે 4 ઓવરમાં 29 રન આપી 2 વિકેટ લીધી હતી. જો કે, અક્ષર પટેલે પહેલાં સુદર્શનનો કેચ છોડયો હતો અને બાદમાં તેને કેચ આઉટ કરતાં મેચને દિલ્હી તરફી બનાવવામાં નિર્ણાયક ભૂમિકા ભજવી હતી. તેણે 3 ઓવરમાં 28 રન આપી 1 વિકેટ પણ લીધી હતી. અગાઉ ગુજરાત ટાઇટન્સ વિરુદ્ધ ધીમી અને નબળી શરૂઆત બાદ છેલ્લી પાંચ ઓવરમાં રનનો ધોધ વહાવીને દિલ્હી કેપિટલ્સે 20 ઓવરમાં 4 વિકેટે 224 રન ખડકયા હતા. કેપ્ટન રિષભ પંત અને ટ્રિસ્ટન સ્ટબ્સની વિસ્ફોટક બેટિંગથી દિલ્હીએ આખરી પ ઓવરમાં 97 રન ઉમેર્યાં હતા. જે આઇપીએલ ઇતિહાસમાં આખરી પ ઓવરનો બીજો શ્રેષ્ઠ ઉમેરો છે. ખાસ કરીને છેલ્લી ત્રણ ઓવરમાં ગુજરાતના બોલરો લાઇન-લેન્થ ભુલ્યા હતા. આથી ઇનિંગ્સના છેલ્લા 18 દડામાં પંત-સ્ટબ્સની જોડીએ 67 રનનો વધારો કરીને મેદાન પર રનનું રમખાણ સજર્યું હતું. 19મી ઓવરમાં 22 અને 20મી ઓવરમાં પંતે 4 છગ્ગાથી 31 રન ઝૂડયા હતા. રિષભ પંત કેપ્ટન ઇનિંગ્સ રમીને 43 દડામાં પ ચોગ્ગા અને 8 છગ્ગાથી આતશી 88 રને નોટઆઉટ રહ્યો હતો. બીજી તરફ ગુજરાત ટાઇટન્સના મીડિયમ પેસર મોહિત શર્માએ 4 ઓવરમાં વિના વિકેટે 73 રન લૂંટાવ્યા હતા. તે આઇપીએલ ઇતિહાસનો સૌથી ખર્ચાળ બોલર બન્યો હતો. દિલ્હીએ પાવર પ્લેમાં જ પૃથ્વી (11), ઝેક ફ્રેઝર (23) અને હોપ (પ)ની વિકેટ ગુમાવી દીધી હતી. આ પછી પીંચ હિટર અક્ષર પટેલ અને કેપ્ટન રિષભ પંતે દબાણની પરિસ્થિતિમાં હલ્લાબોલ શરૂ કરી ગુજરાતની બોલિંગ-ફિલ્ડિંગ છિન્નભિન્ન કરી દીધી હતી. આ બન્ને વચ્ચે ચોથી વિકેટમાં 68 દડામાં 113 રનની તાબડતોબ ભાગીદારી થઇ હતી. અક્ષર પટેલે 43 દડામાં પ ચોગ્ગા-4 છગ્ગાથી 66 રનની આક્રમક ઇનિંગ્સ રમી હતી. ડેથ ઓવર્સમાં પંતની ફટકાબાજી શરૂ થઇ હતી, જેમાં ટ્રિસ્ટન સ્ટબ્સે બખૂબી સાથ આપ્યો હતો. તે માત્ર 7 દડામાં 3 ચોગ્ગા-2 છગ્ગાથી 26 રને નોટઆઉટ રહ્યો હતો અને પંત સાથે પાંચમી વિકેટની અતૂટ ભાગીદારીમાં 18 દડામાં 67 રન કર્યાં હતા. ગુજરાત તરફથી સંદિપ વોરિયરે 3 ઓવરમાં 1પ રનમાં 3 વિકેટ લીધી હતી.