ભુજ, તા.29: ત્રણેક દિવસ પૂર્વે ભુજ તાલુકાના એક ગામમાંથી 14 વર્ષિય સગીર છોકરો ગુમ થતાં અપહરણની ફરિયાદ નોંધાઈ છે. આ અંગે પદ્ધર પોલીસ મથકે 13 વર્ષ અને આઠ માસનો છોકરો ગુમ થતાં તેના પિતાએ ફરીયાદ નોંધાવી હતી કે, ગત તા.26/4ના સવારે છોકરો ઘરેથી નીકળ્યા બાદ પરત ઘરે ન આવતાં સગા-સંબંધિઓની પુછપરછ કરી હતી. બીજા દિવસે આજુ-બાજુના ગામો અને હાજીપીરના મેળામાં પણ તપાસ કરી, માઈકમાં છોકરા અંગે જાહેરાત કરી હતી. સગા-સંબંધીઓના વોટ્સએપ ગ્રુપમાં પણ ફોટા સાથે ગુમ થયા અંગે પોસ્ટ વાયરલ કરી હોવા છતાં આજદીન સુધી ગુમ થયેલો સગીર દિકરો ન મળતાં કોઈ અજાણ વ્યક્તિએ લોભ-લાલચ આપી કાયદેસરના વાલીપણામાંથી અપહરણ કરી ગયાની શંકા હોઈ ફરીયાદ નોંધાવી છે. પોલીસે કલમ 363 મુજબ ગુનો દાખલ કરી તપાસ હાથ ધરી છે. ઉજળાવાન વાળો પાતળા બાંધાના આ સગીરે બ્લેક ટી-શર્ટ-લેંઘો પહેર્યો હોવાનું ફરિયાદમાં લખાવાયું છે.
