સ્ટાર્મર ભારત સાથેની આર્થિક ભાગીદારીથી ભારે ઉત્સાહમાં

ભારતનાં અર્થતંત્રને પાંગળું બતાવવાની કોઈ પણ તક જતી ન કરતા અમુક વિપક્ષી નેતાઓ અને અમેરિકાના અમુક વગદાર વર્તુળોને બ્રિટિનના વડાપ્રધાન કીર સ્ટારર્મરે મુંબઈમાં આડકતરી રીતે જડબાંતોડ જવાબ આપી દીધો છે. બે દિવસની મુલાકાતે આવેલા બ્રિટિશ વડાપ્રધાને ભારતીય વડાપ્રધાન નરેન્દ્ર મોદીની સાથે દ્વિપક્ષીય બેઠકમાં પરસ્પર સહયોગ વધારવાનાં શ્રેણીબદ્ધ પગલાં પર સંમતિ સાધવાની સાથોસાથ ભારત સાથેની ભાગીદારીને વિકાસના લોંચપેડ સમાન ગણાવી હતી. ચાવીરૂપ પ્રતિનિધિ મંડળ સાથે મુંબઈ આવેલા બ્રિટિશ વડાપ્રધાને ભારત સાથે વેપાર, શિક્ષણ અને ટેક્નોલોજીનો સહયોગ વધારવા સહમતી સાધી છે. મોદી સાથેની બેઠક દરમ્યાન બન્ને દેશે નવા વેપારકરારનો જલ્દી અમલ કરાવવા માટે પણ ચર્ચા કરી. હવે બ્રિટન તેની નવ યુનિવર્સિટીના ભારતમાં કેમ્પસ ખોલી શકશે. આમ બન્ને વડાપ્રધાન દ્વિપક્ષીય સંબંધને નવી ઊંચાઈએ પહોંચાડવા કામે લાગ્યા છે.  ઉલ્લેખનીય છે કે, ગયા જુલાઈ મહિનામાં મોદી બ્રિટન ગયા હતા ત્યાં પણ દ્વિપક્ષીય સહયોગ વધારવાની સહમતી સધાઈ હતી. ર્સ્ટામર તેમની સાથે તેમના દેશના ઉદ્યોગજગતના માંધાતાઓના પ્રતિનિધિ મંડળને લઈને આવ્યા હતા. તેમણે ભારત સાથેની ભાગીદારીને ભારે મહત્ત્વપૂર્ણ ગણાવી હતી. ભારતીય વડાપ્રધાને બ્રિટનને સ્વાભાવિક ભાગીદાર ગણાવ્યું છે. બન્ને દેશ વચ્ચેની આ ઉચ્ચ સ્તરીય બેઠકના બે મહિના અગાઉ આર્થિક અને વેપાર સહકાર અંગેના વિસ્તૃત કરાર થયા હતા. હવે આ કરારનો ઝડપભેર અમલ કરવા એક સંયુક્ત સમિતિની રચના કરવાની મુંબઈમાં દ્વિપક્ષીય જાહેરાત કરાઈ છે. આ નવા વેપારકરારથી બન્ને દેશને મોટો ફાયદો થશે એવી ગણતરી મંડાઈ રહી છે. આ કરાર હેઠળ બ્રિટનથી ભારતમાં આયાત થતી વસ્તુઓ પર હાલનો સરેરાશ ટેરિફ 1પ ટકાથી ઘટીને માત્ર ત્રણ ટકા થઈ જશે, તો ભારતથી બ્રિટન નિકાસ થતા 99 ટકા ઉત્પાદનોને ટેરિફમુક્તિ મળી જશે. આ કરારના અમલથી વેપારીઓ અને ગ્રાહકો બન્નેને ફાયદો થશે. હાલે બન્ને દેશ વચ્ચે પ6 અબજ ડોલરનો વેપાર છે જે 2030 સુધી બે ગણો કરવાનું લક્ષ્ય રખાયું છે. ઉલ્લેખનીય છે કે, અમેરિકાએ ચીન અને બાંગલાદેશના કાપડ પર ભારતની સરખામણીએ ઓછો ટેરિફ રાખ્યો હોવાને લીધે ભારતીય કાપડ ઉત્પાદનેની નિકાસમાં દસ ટકાનો ઘટાડો થઈ શકે છે. બ્રિટન સાથેના આ કરારથી નિકાસમાં આવનારી ઘટને સરભર કરી શકાશે એવી આશા રખાઈ રહી છે. બન્ને દેશના વડાપ્રધાન દ્વિપક્ષીય સંબંધમાં સહયેગ અને સમજૂતીઓને ઐતિહાસિક ગણી રહ્યા છે. હાલની વૈશ્વિક પરિસ્થિતિમાં નવા વિકલ્પ ખરા અર્થમાં આત્મવિશ્વાસ વધારે તેવા છે. ખાસ તો અમેરિકા સાથેના કોઈ પણ સંવાદમાં આ નવા વિકલ્પો બન્ને દેશને વધુ મજબૂતી આપી શકશે. બ્રિટિશ વડાપ્રધાને જે રીતે ભારતીય અર્થતંત્ર ઝડપભેર દુનિયામાં અગ્રેસર થઈ રહ્યંy છે તેની પ્રસંશા કરી છે તે રાહુલ ગાંધી જેવા વિપક્ષી નેતા અને ટ્રમ્પ સરકારના અધિકારીઓએ ધ્યાને લેવી જોઈએ.