નવી દિલ્હી, તા. 29 : રોહિત શર્મા
અને વિરાટ કોહલી 2027 વર્લ્ડ કપ
રમશે કે નહીં તે મોટો સવાલ ઉઠી રહ્યો છે. પહેલાં અહેવાલ હતો કે ઓસ્ટ્રેલિયા સામે રમાયેલી
વનડે શ્રેણી બન્ને દિગ્ગજ માટે અંતિમ શ્રેણી રહેશે. જો કે અંતિમ મુકાબલામાં રોહિત શર્માએ
સદી કરી હતી અને વિરાટ કોહલીએ 74 રનની મહત્ત્વની
ઈનિંગ રમી હતી. રોહિત શર્મા અંતિમ મેચમાં પ્લેયર ઓફ ધ મેચની સાથે પ્લેયર ઓફ ધ સિરીઝ
બન્યો હતો. તેવામાં હવે આવતીકાલે 30 નવેમ્બરથી શરૂ થનારી દક્ષિણ આફ્રિકા સામેની વનડે શ્રેણીમાં પણ
રોહિત અને કોહલી સામેલ કરવામાં આવ્યા છે. અહેવાલ છે કે બીસીસીઆઈ કોચ ગૌતમ ગંભીર અને
મુખ્ય પસંદગીકર્તા અજિત અગરકર સાથે બીસીસીઆઈ રોહિત અને કોહલીના ભવિષ્ય અંગે બેઠક કરી
શકે છે. બીસીસીઆઈ દક્ષિણ આફ્રિકા સામેની વનડે શ્રેણી પૂરી થયા બાદ પસંદગીકારો અને ટીમ
મેનેજમેન્ટ વચ્ચે એક બેઠકની યોજના બનાવી રહ્યું છે. જેથી 2027ના વનડે વિશ્વકપને ધ્યાને રાખીને
રોહિત શર્મા અને વિરાટ કોહલીના ભવિષ્ય ઉપર વિચાર કરી શકાય. અહેવાલ અનુસાર બીસીસીઆઈના
ટોપ અધિકારી, કોચ ગૌતમ ગંભીર અને ચીફ
સિલેક્ટર અજિત અગરકર આગામી અઠવાડિયે ત્રીજી વનડે માટે અમદાવાદ પહોંચતા સાથે બેસી શકે
છે. રોહિત અને કોહલી સાથે હજી સુધી વનડે વિશ્વકપ અંગે નક્કી વાત કરવામાં આવી નથી. તેવામાં
સૂચનો આવ્યાં છે કે આ બન્ને માટે બેકઅપ ખેલાડીઓના બેકઅપ ઉપર કામ કરી રહ્યું છે. બીસીસીઆઈ
સૂત્રો અનુસાર રોહિત અને કોહલી જેવા ખેલાડીઓ સાથે સ્પષ્ટ વાત જરૂરી છે કે બોર્ડ બન્ને
પાસે શું આશા કરી રહ્યું છે. તેઓ માત્ર અનિશ્ચિતતા સાથે રમી શકે નહીં.
